Thaçi: Hapja e rrugëve në veri, çështje ditësh

Në një intervistë të dhënë për Zërin e Amerikës, Kryeministri i
Kosovës, Hashim Thaçi deklaroi se bllokimi i rrugëve në veriun e Kosovës
do të marrë fund dhe zbatimi i marrëveshjes me NATO-n, për tejkalimin e
situatës në atë pjesë të vendit, nënkupton vendosjen e rendit dhe
ligjit në tërë Kosovën.
“Jemi të informuar, po ndjekim situatën nga afër. Disa qytetarë serbë
të veriut, ende janë të manipuluar nga strukturat kriminale, janë të
ndikuar nga ata. Por, dëshiroj të theksoj se pika një e marrëveshjes mes
qeverisë së Kosovës dhe NATO-s, do të zbatohet shpejt dhe bllokadat dhe
bllokuesit i kanë orët e numëruara për hapjen e tyre. Në rast të
kundërt qeveria e Kosovës, do të shfrytëzojë të gjithë kapacitetin e saj
kushtetues dhe ligjor për hapjen e rrugëve”, deklaroi Thaçi.

Duke folur për një nisje të mundshme të bisedimeve Kosovë- Serbi,
Kryeministri theksoi se Veriu nuk do të jetë në tryezën e bisedimeve në
asnjë rrethanë.