Milani i jep fund dominimit të Interit

Milan ka mposhtur Interin në finalen e Super-Kupës së Italisë.
Ndeshja e luajtur në Pekin ka përfunduar 2-1 në favor të
kuqezinjve. Fillimisht ishte Interi që kaloi në avantazh me një gol të
Shnajderit nga një goditje dënimi. Holandezi që flitet se mund të
largohet drejtë Mançester Junajtid ka realizuar një goditje perfekte
duke e çuar topin ngjitur me shtyllën pingule.

Pjesa e parë u mbyll me një Milan të përgjumur ndërsa akti i dytë për
të ishte totalisht ndryshe. Një pasim i Klarenc Sedorf për Ibrahimoviç u
kthye në gol nga Suedezi pavarësisht se lojtarët e Interit kanë
protestuar gjatë për pozicion jashtë loje. Nëntë minuta pas barazimit
1-1, ishte Boateng në të 69’ që me golin e tij përmbysi rezultatin.

Pekini edhe pse ishte shumë familjarë me skuadrën e Interit – pasi
mbi 80 milionë kinezë janë tifozë të këtij ekipi – nuk i ka sjellë fat
në këtë finale. Milani gjatë këtij sezoni ka arritur ta mposhtë Interin
në të 3 përballjet. Me këtë trofe kuqezinjtë duke se i kanë dhënë fund
dominimit të Interit në Itali në pesë vitet e fundit.

Kjo është Super-Kupa e gjashtë për Milanin ndërsa Interi këtë trofe e ka fituar pesë herë.