Horrori i Korçës, kapet 84-vjeçari, pranon krimin: Nuk tregoj kokën

Policia e Korçës ka bërë një punë të lavdërueshme duke arritur në
kohë rekord të zbulojë identitetin e viktimës dhe të dyshuarit të krimit
të llahtarshëm që tronditi dje opinionin publik. Viktima është Liljana
Arapi 42 vjeçe lindur e banuese ne qytetin e Bilishtit, e papunë, e
pamartuar, kurse autor i krimit, Gaqo Dumka, 84 vjeç, lindur ne fshatin
Dardhë dhe banues ne lagjen nr 4 Korçë.

Nga hetimi rezultoi se plaku bashkëjetonte me gruan që vrau dhe
copëtoi tek një banesë në lagjen nr 4. Sipas hetimit, i dyshuari e
prezantonte Lilianën sikur ishte mbesa e tij duke justifikuar kështu
bashkëjetesën në një shtëpi.

Ndërkohë nuk është gjetur koka e të ndjerës. I dyshuari pasi u ndalua
dje në orën 19.00, pranoi se ishte ai autor i krimit. Ai pohoi se në
kushte xhelozie, pas një sherri mes të dyve, fillimisht e kishte mbytur,
pastaj therur me thikë dhe e kishte prerë trupin e zhveshur në disa
copa të cilat i kishte futur në dy thasë. Kokën e kishte hequr veçmas
duke e fshehur.

Sipas burimeve të policisë, ai refuzon të tregojë se ku gjendet koka e
të ndjerës. Dyshohet që motivi i këtij krimi të jetë xhelozia. Policia
tha se materialet e përpiluara nëngarkim të shtetasit të sipërpërmendur
i kaluan Prokurorisë së Rrethit Gjyqësor Korçë për veprën penale
“Vrasje në rrethana të tjera cilësuese”.

Në cilësinë e provës materiale, 84 vjeçarit iu sekuestruan:

- 2 aparate celularë që i përkisnin autorit të ngjarjes dhe viktimës.

- sendet e kryerjes së krimit (1 sëpatë dhe 2 thika)

- tesha të viktimës dhe të autorit.

- janë vërejtur njolla gjaku në ambientet e brendshme dhe të jashtme të banesës.