Xhobs dha dorëheqje nga “Apple”

Stiv Xhobs dha dorëheqje nga vendi drejtor kryesor ekzekutiv i gjigantit teknologjik "Apple".

Supozohet se arsye për dorëheqjen pas kryerjes 14-vjeçare të funksionit janë problemet shëndetësore.

Themeluesi 55-vjeçar i "Apple", i cili luftoi me kancerin në pankreas në vitin 2004, ndërsa në vitin 2009 iu transplantua mëlçia, mori pushim më 17 janar të këtij viti për një periudhë të pacaktuar, por nuk shpjegoi se për çfarë problemi shëndetësor bëhet fjalë.

Xhobs do të zëvendësohet si drejtori kryesor ekzekutiv i korporatës nga njeriu i dytë në hierarkinë e saj - drejtori kryesor operativ Tim Kuk, i cili një kohë të gjatë llogaritej si trashëgimtari i tij. Vetë Xhobsi me dëshirën e tij është zgjedhur për kryetar të këshillit drejtues të kompanisë.

Legjenda e Luginës së silikonit, i cili e publikoi vendimin e tij në letër të shkurtër deri te këshilli i drejtorëve të "Apple", nuk i ceki arsyet.

"Çdoherë kam thënë se nëse një ditë nuk mund t'i kryej të gjitha obligimet dhe t'u përgjigjem pritjeve si drejtor i 'Apple', do të jem i pari që do t'ju njoftoj për këtë. Për fat të keq, ja erdhi edhe ajo ditë", shkruan Stiv Xhobs.

Në të njejtën kohë ai planifikon ta mbajë vendin e tij në këshillin e drejtorëve në kompaninë "Uolt dizni".

Shefi i njërës prej kompanive udhëheqëse në sferën e IT teknologjive u paraqit për një kohë të shkurtër në mars, që ta prezantojë versionin më të ri të Ajpadit (iPad) dhe që të merr pjesë në darkë të organizuar nga presidenti Barak Obama për liderët teknologjikë të Luginës së silikonit.

Aksionet e gjigantit teknologjik u liruan në mënyrë drastike për shtatë për qind pas lajmit për dorëheqjen, deri në 357,40 dollarë. Ato u ndaluan nga tregtia para se të publikohet tërheqja e Stiv Xhobsit, ndërsa dje u shtrenjtuan për 0,7 për qind deri në 376,18 dollarë.

Xhobs e themeloi kompaninë në vitin 1976 së bashku me Stiv Vounjak dhe Ronald Uejn. Ai luajti rol kyç për revolucionin e kompjuterëve personalë. Ai u largua nga "Apple" në vitin 1985, që çoi deri në rënie të kompanisë. Gjërat sërish ecën përpara pasi që ai mezi është bindur që të kthehet në gjigantin teknologjik në vitin 1996.

Xhobs në vitin 2001 e prezantoi pleerin muzikor Ajpod (iPod), në këtë mënyrë duke i vendosur bazat për dalje edhe të Ajfonit (iPhone) në vitin 2007 dhe në vitin 2010 të Ajpadit (iPad).