Luana Vjollca jam e lumtur!

Një verë e nxehtë duket kjo që po kalon për Luana Vjollcën. Edhe pse e palëkundur në vendimin për të mos treguar detajet e jetës personale, bukuroshja e Top Channel rrëfen se është e lumtur. Sepse i kanë ndodhur plot gjëra… Në ekran ka munguar për fare pak ditë. Aq sa kur telefoni celular i Luana Vjollcës dilte i mbyllur, dukej si çudi. Sado shumë të ishin alternativat e mundshme mbi destinacionin e saj përtej orarit që shfaqej në ekran, vështirë të mendohej se vajza e motit, në fakt, nuk ishte fare në Tiranë. Për më tepër që, sidomos këto javët e fundit, nuk ka munguar edhe në faqet e shtypit rozë. Megjithëse pa dëshirën e saj, prezantuesja e Top Channel ka marrë pas vetes vëmendjen maksimale dhe siç ndodh zakonisht arsyeja ka qenë e lidhur me jetën personale, pra krejtësisht objektive për të justifikuar faqet e para dhe titujt me gërma të mëdha.
Megjithatë edhe kështu, Luana Vjollca ka zgjedhur të qëndrojë në hije. Larg interesit të gazetarëve, të cilët e kanë gjëmuar jo pak këto ditë për t’i marrë ndonjë fjalë, e mbi të gjitha e palëkundur në një vendim që ka marrë këtu e shumë vite me parë, që kur shkeli në ekran, se do ta ruante me fanatizëm brenda mureve të shtëpisë jetën e saj personale. I është përmbajtur këtij betimi edhe e motra, Marina, e cila ka sqaruar deri diku mungesën e këtyre ditëve të Luanës. Marina nuk përtonte të priste dhe përcillte telefonatat që për objektiv kishin Luanën, me përgjigjen se për disa ditë kjo e fundit nuk do të ndodhej në Tiranë: Luana ishte me pushime.

Dhe ndërkohë që 4-5 ditët (siç thoshte edhe Marina), kaluan shpejt, Luana ka bërë regjistrimin e radhës për hapësirën televizive të parashikimit të motit. Pushimet i mbaroi dhe këtë e reflekton edhe në lëkurën e nxirë fort dhe fytyrën e relaksuar. Që prej javës së kaluar puna ka rifilluar normalisht kështu që Luana shfaqet çdo natë në ekran, në të njëjtin orar, me të njëjtën linjë elegante veshjesh dhe pa ndryshuar asgjë në formën e saj fizike.

Por vetëm në imazh ama, sepse po t’u referohesh lajmeve të fundit që janë thënë e shkruar për 20 vjeçaren, të reja ka plot. Fjala vjen kanë thënë se është fejuar, duke përmbyllur kështu me një fund të lumtur një histori disavjeçare dashurie. Çka të lë kuptosh se kjo mund të ishte qershia mbi tortë për Luanën, e cila vjen pas një sezoni televiziv me plot të reja për t’u shënuar, me prezantime spektaklesh të rëndësishme, që premtojnë një sezon të dytë të mbarë për prezantuesen. Javët që ka kaluar tek “E diell” dhe ditët në “Top Fest 8″ bashkë me Marinën, i hapin rrugë pritshmërisë për të tjera spektakle, por siç thotë Luana, pa hequr dorë nga parashikimi i motit. Një vit i mbarë me pak fjalë për të cilën, brunia e motrave Vjollca është gati të rrëfejë gjerë e gjatë. Me një përjashtim “të vogël”: Këtë punën e fejesës më mirë jo! “Është jeta ime private”, thotë për të disatën herë Luana Vjollca, duke lënë vetëm një shteg shumë të vogël të hapur, për të nënkuptuar diçka më shumë.

“Më përket vetëm mua dhe kështu duhet të mbetet”. Luana e ka marrë këtë vendim shumë kohë me parë dhe duket e bindur të mos e shkelë, sado që, heshtja e saj çdo herë duket se ka shkaktuar efekt të kundërt. “Mund t’ju them vetëm se jam shumë e lumtur dhe se po jetoj ditë shumë të gëzuara”. E mbyll me kaq këtë pjesën e jetës pritave duke nënkuptuar atë fundin e lumtur për të cilin është folur aq shumë dhe që i drejtohet një emri: Adrian Gaxhës me të cilin siç është thënë tashmë e lidh një ndjenjë e fortë dashurie.

“Unë si gjithmonë do të qëndroj e heshtur. Jo sepse s’ka asgjë për të përgënjeshtruar apo për të pohuar në këtë mes, po për faktin se kjo është krejtësisht jeta ime private dhe unë do e ruaj gjithmonë si të tillë”, thotë Luana, e cila ndërkohë nuk mban asnjë lloj unaze në gishta. Megjithatë. Ndërkaq gjatë këtyre pushimeve ka qenë edhe në Shkup, por pjesën më të madhe të tyre e ka kaluar me familjen në plazhet e jugut.

“Pushime sapo i përfundova dhe ndihem e relaksuar. Si çdo vit e tërë familja ime mblidhet dhe pjesa më e madhe e ditëve kalohet me to. E duam shumë Jugun dhe pushimet tona nuk kalojnë pa disa dite atje. Megjithatë edhe kam lëvizur në disa vende të tjera këtë vit”. Tek e fundit nuk ka nevojë të shtojë më shumë. Luana e përsërit për të disatën herë se do të qëndrojë e heshtur, jo aq pse ska asgjë për të përgënjështruar apo pohuar, por për faktin se privatsisë së saj do ti qëndrojë besnike deri në fund. Për të tjerët duhet të mjaftojë fakti se ndihet si në qiellin e shtatë dhe sytë e qeshur dhe buzëqeshja që i përvijohet qetë mbi buzë janë fjalët që Luana është betuar të mos i shqiptojë kurrë publikisht.

Dhe si për ta kompensuar, Luana nuk është kursyer kur ka ardhur puna për të folur për karrierën që po ndërton në Top Channel, për marrëdhenien me Marinën dhe sidomos për prezantimin, një fushë në të cilën këtë vit ka pasur plot surpriza. U shfaq në krah të katër bukurosheve të tjera në spektaklin e përjavshëm “E diell” dhe pak kohë më pas, në programin e përditshëm të Top Fest dhe më pas natën gala e mbizotëruan në fakt Luana dhe Marina Vjollca. Biondia dhe brunia, dikur velina të Fiks Fare duket se po jetonin momentin e tyre. Nga një anë Marina nuk hoqi dorë nga emisioni sportiv dhe Select, ndërsa Luana nga parashikimi i motit. Një hapësirë e vogël televizive, por që Luana ka vendosur t’i japë një vend nderi në cv e saj të deritanishme, përderisa ai pakminutësh i përnatshëm, e mban të lidhur me publikun. “U futa tashmë në vitin e tretë që jam çdo ditë në ekran dhe ashtu siç besoj se njerëzit janë mësuar me mua që t’u tregoj çdo mbrëmje se si është koha përë nesër, ashtu edhe unë u mësova me këtë punë. Më mban në kontakt të vazhdueshëm çdo ditë me publikun dhe kjo më pëlqen. Më duket se do të bëhem meteorologe e mirëfilltë edhe pak”, shton në fund duke qeshur.

Nuk i vjen keq pra kur i thonë vajza e motit, e aq më pak kur e identifikojnë me atë program. Mbase sepse prej tij kaloi, në fillim tek “E diell” dhe më pas në Top Fest 8, një festival i rëndësishëm i muzikës moderne, i cili çdo vit u ka dhënë shanse të reja prezantueseve të tij.

“Është e vërtetë, ky ka qenë një vit sa i suksesshëm aq edhe i bukur sepse gjithçka ka ardhur papritur. Top Fest na u besua mua dhe Marinës sepse na panë sa mirë koordinoheshim me njëra-tjetrën në një tjetër emision ku ishim bashkë: “E diell”. Ka qenë një sezon i mbushur plot. Sigurisht kërkonte shumë punë dhe ka pasur shumë lodhje, por jam e lumtur që rezultati final ishte ashtu siç e dëshiroja. Jam e lumtur me gjithçka që lashë pas në atë sezon”.

Përgjatë të cilit Luana dhe Marina sërish kanë qenë bashkë. Është e njohur tashmë lidhja e dy motrave Vjollca, njëra shndërruar në bionde për shkak të emisionit të parë ku u pranuan të performonin së bashku: “Fiks Fare”. E kanë rrëfyer shumë herë se në familjen e tyre femërore ekziston një lidhje e ngushtë dhe se Luana është shoqja e ngushtë e Marinës dhe anasjelltas. Nuk është çudi që të kërkosh Luanën dhe t’i biesh telefonit të Marinës për të folur me të, ashtu siç nuk përbën më lajm fakti se dy vajzat kanë ndjekur të njëjtë shkollë – degën juridike – vetëm që të mos ndaheshin nga njëra-tjetra. Kjo pavarësisht se në të vërtetë, po të ishte për të zgjedhur, Luana do të kishte dëshiruar tjetër gjë. Të njëjtën ndjesi lënë edhe në çdo skenë që shfaqen së bashku, ndërkohë që transmetimi për javë të tëra i “Top Fest” duket se shënoi kulmin e përshtatjes mes të dyjave.

Por a nënkupton kjo se më në fund motrat duhet të mendojnë të ndërtojnë një karrierë individuale? Ose të jenë mërzitur nga fakti se kur përmend emrin e njërës ke thënë edhe tjetrën? “Na ndodh shpesh herë të na ngatërrojnë, por ne nuk na pengon kjo gjë, madje na pëlqen”, thotë Luana. “Personalisht do të më pëlqente të qëndronim si dyshe edhe për shumë kohë të tjera në ekran. Nuk ka gjë më komode dhe të bukur sesa të punosh me motrën tënde”.

Në fund të fundit kështu u bënë të njohura dhe sa më shumë të zgjasë karriera e “motrave prezantuese” si Luana, ashtu edhe Marina nuk mund të jenë tjetër veçse të kënaqura. Sidomos pas një sezoni të ngjeshur me emisione dhe spektakle si ai i kaluari, i cili duket se do t’i lërë vendin një tjetri, gjithashtu plot. “Nuk po zbuloj akoma asgjë sepse është ende herët, megjithatë ajo çfarë shpresoj është që edhe ky sezon të më presë me surpriza si sezoni që lashë pas”, thotë Luana. Pas një viti të tërë të mbarë, kështu presin të gjithë. Mbetet vetëm titulli i spektaklit ku do të shfaqet kësaj here.

Revista Klan