Xhani Shqerra: Fejesa ime me Vitjolën do të jetë tradicionale!

Lidhja e tyre daton kohë më parë, por tani kanë vendosur që ta zyrtarizojnë këtë histori dashurie edhe me fejesë, e cila do të ndodhë shumë shpejt, por ndonjë datë të caktuar ende nuk ka nga çifti. Xhani Shqerra, i njohur si këngëtar me një vokal melankolik si dhe president tek kompania “Emotion lifestyle agency”, ka vendosur që të mos bëjë më jetën e një beqari. Zemrën e tij e ka vjedhur bukuroshja Vitjola Viso, vajza me të cilën këngëtari i njohur ka vendosur të vazhdojë pjesën tjetër të jetës. Xhani dhe Vitjola janë në lidhje prej disa vitesh, teksa mediat kanë shkruar mbi këtë fakt, por tashmë ata kanë vendosur të fejohen. “Për lidhjen tonë është folur në disa media, por një rrëfim të plotë ende nuk e kemi bërë, pasi presim ta bëjmë në momentin e kryerjes së ceremonisë së fejesës”, thekson Xhani. Teksa e pyetëm se kur mund të ndodhë fejesa e tyre, ai nuk ishte në gjendje të na jepte ndonjë datë dhe kohë të caktuar, por vetëm tregoi se është mjaft i hapur por me tradita dhe se fejesa e tij do të jetë shumë tradicionale. “Jam shumë i hapur, por me tradita”, tha në fund Xhani Shqerra, i cili ende nuk ka përgatitur ndonjë këngë të re për publikun e tij, ndërkohë që është paraqitur disa herë nëpër festivale. Panorama Plus