Kastriot Tusha dhe Shkëlzen Jetishi, koncert në Gjakovë!

Njëri është artist i madh nga Shqipëria, ndërsa tjetri është ikonë e muzikës gjakovare. Kastriot Tusha dhe Shkëlzen Jetishi janë bërë bashkë për të tretin vit me radhë në mënyrë sofrës së bukur të artdashësve gjakovarë t’i dhurojnë ariet e vjetra, të pazëvendësuara, me motive nga Shqipëria e Mesme. Derisa para tri vitesh, koncerti i parë i kësaj duoje iu kushtua këngëve të artistit të madh Isuf Myzyrit, viti i kaluar kishte në retrospektivë këngët e Qamilit të vogël, këtë vit, Tusha dhe Jetishi bashkë me dy të ftuarat në koncertin solistik, Irma Zyberi dhe Nezafete Shala, do të sjellin për publikun këngët e bukura e të vjetra nga artisti Mustafa Budini.

“Do të jenë disa prej këngëve të tij që i dinë të gjithë. “Kënga e dallëndyshes”,”Kënga e kumrisë”,”Mori vjollca që qelë në saksi” dhe disa tjera do ti sjellim për publikun gjakovar” tregon Tusha, plot entuziazëm për shkak te kthimit për performimin e radhës në Gjakovë. Sipas tij, qyteti i Gjakovës e meriton një eveniment të tillë “Gjakova është një qytet me një traditë dhe qytetërim të lashtë, dhe që e pret mirë muzikën.

Gjakovarët dhe Gjakova e meritojnë këtë lloj muzike” shton Tusha. Për Mustafa Budinën, si zgjedhje e tyre për këtë koncert solistik, Kastriot Tusha thotë se këngët e tij janë në çdo sofër shqiptare, në jug e veri, dhe ai është ende i këndueshëm nga nostalgjikët e asaj kohe. Për koncertin e sivjetmë, të tretin me radhë, Tusha thotë se e veçantë është vetë harmonizimi midis zërit të tij dhe atij të Xenit.

“Tanimë jemi bërë miq të vjetër, Xeni është një shok i mirë, dhe ka vlera sepse ende vazhdon ta ndjekë traditën e një brezi të artë. Ai e sjell këngën gjakovare por edhe këngën shqipe në përgjithësi me një vlerë shumë të madhe” shton Tusha,i cili qëndroi pak në Prishtinë para së të nisej për Gjakovë. Koncerti i dyshes Tusha Jetishi do të mbahet nesër (e premte) në Qendrën e Kulturës në Gjakovë, me fillim nga ora 20:00.