Paskuintat e finales te “Kenga Magjike 2011″

Festivali “Kënga Magjike” i njohur prej vitesh për popullaritetin e tij, ka mbyllur gjatë ditës së shtunë edicionin e 13-të përmes një show gjigant ngjyrash në atë që vetë Ardit Gjebrea e ka pagëzuar si Pallatin e Koncerteve. Fituesi i këtij edicioni, Redon Makashi u shpall në mënyre unanime nga të gjithë këngëtarët. Shumë prej jush do të thonë që jo të gjithë e votuan Redonin me 20 pikë, por kjo nuk është diçka e re…Jemi mësuar tanimë të shohim qokat e këngëtarëve të ndryshëm ndaj njëri-tjetrit. Ajo që ndryshoi këtë vit ishte diferenca e madhe e pikëve të Redonit me duetin e vendit të dytë (Pirro Çako e Vedat Ademi), që provoi për një dëshirë unanime. Po cilët ishin këngëtarët e kënaqur të këtij edicioni dhe cilët ishin ata që rrudhën vetullat? Çfarë ndodhi tjetër aty në backstage? Sikletet e këngëtarëve dhe diskutimet e djeshme në “E Diela Shqiptare”. Le t’i zbulojmë bashkë të gjitha detajet, shumë prej tyre të padala mbi ekran…

Tek tavolinat VIP

Siç e patë, në ekran të gjithë këngëtarët ishin përpjekur të merrnin në tavolinat e miqve, njerëz sa më të zgjedhur nga jeta publike madje edhe kur këta të fundit nuk ishin miq të vërtetë të tyre. Por duke lënë mënjanë këtë pjesë, situata në backstage, apo thënë ndryshe në vendin rezervuar VIP-ave, ishte mjaft e ngrohtë. Më pëlqeu solidariteti që kishin këngëtarët për njëri-tjetrin dhe duartrokitjet e zjarrta që dhuronin sa herë që një çmim fitohej, apo kur një këngëtar kthehej nga skena, megjithë mërzitjen e disa prej këtyre të fundit në fytyrë.

Të pakënaqurit?

Nuk mund t’i quajmë tamam të tillë, por ndoshta emrat e poshtëpërmendur janë më pak të kënaqurit e këtij edicioni. “Zhgënjimi” i reperit Noizy u duk qartë që nga statusi i tij mesditën e së shtunës, ku nuk dukej shumë entuziast për çmimin e internetit, por më pas kjo mërzitje u evidentua edhe në sallën e Pallatit të Koncerteve, ku Rigels Rajku zgjodhi të mos qëndronte deri në fund të spektaklit. Këngëtarja e talentuar e skenës shqiptare Greta Koçi nuk u duk shumë e kënaqur nga çmimi i interpretimit, pasi të njëjtin çmim ajo e fitoi edhe gjatë edicionit të vjetshëm të këtij festivali. Sakaq Rosela Gjylbegu, shkodrania kampione siç e quan Gjebrea, e cila u kurorëzua me çmimin ‘Best Lyrics’ nuk është se pati ndonjë reagim të jashtëzakonshëm dhe më të drejtë sepse në këtë rast nuk vlerësohej ajo, vokali ose performanca shumë e mirë, por tekstshkruesi, Big Basta, i cili duhet thënë se u nda i vlerësuar mirë nga ky festival. Veç çmimit “Best Hip-hop”, të cilin e fitoi nga bashkëpunimi aq shumë i duartrokitur me Anxhelon, ai fitoi edhe çmimin për tekstin më të mirë.

Debatet në “E Diela Shqiptare”

Dhe siç është bërë zakon tani, pas çdo finaleje, biseda për pikët zhvendoset në studion e të “Dielës Shqiptare” në të cilën dhe janë prezantuar për herë të parë këngët. Më poshtë po ju sjellim disa nga fjalitë që na bënë më shumë përshtypje. Që nga propozimet për ndryshimin e strukturës tek sikletet e këngëtarëve…

Arditi sqaroi gjatë puntatës së djeshme arsyen se pse gjatë këtij edicioni u dhanë 21 çmime. “Noizy-in e futa në finale për shkak të votave të publikut, sepse referuar votimeve të këngëtarëve ai renditej i 24″,- sqaroi Gjebrea dje në spektakël ndërsa foli edhe për dilemën e madhe që kishte në marrjen e këtij vendimi, megjithatë kur vjen puna tek publiku ai është shumë i rëndësishëm. Gjebrea shtoi gjithashtu se Noizy i kishte premtuar pjesëmarrjen në program, “por sot (dje) e ka të fikur celularin”, – tha ai,- dhe kjo ndoshta për shkak të pakënaqësisë që kishte Noizy në lidhje me çmimin.

Propozimi i Pirros për të eksperimentuar një tjetër sistem pikësh u pranua nga producenti i festivalit dhe nga viti i ardhshëm, këngëtarët do të kenë në dispozicion 25 pikë, ndonëse në finale do të mbërrijnë sërish vetëm 20 këngëtarë.

Meqenëse Ermal Mamaqi nuk ia doli të ishte në dhjetëshen më të mirë, site ikub.al ofroi për të 1 milion lekë.

Këngëtarja Albërie Hadërgjonaj shprehu edhe një herë sikletin e kopsave që iu hapën në finale, të cilin nuk e kurseu ta ndante me kolegët jo vetëm kur ishte në skenë por edhe në backstage. Gjatë së dielës Hadërgjonaj tha se e kish krijuar që në finale idenë e këngës me të cilën do të konkurrojë vitin e ardhshëm dhe pse jo pas propozimit të Arditit, mund të vijë në duet me të bijën.
Olta Boka, si fituese e çmimit të AMC-së nuk u rezervua dhe e tha hapur se është në pritje të dhuratës që ka menduar kompania celulare për të.

Rosela Gjylbegu tha në fjalën e saj se nuk do t’i harrojë drekat me koleget: Besa Kokëdhima, Era Rusi e Jonida Maliqi. Ndërkaq ajo nuk ngurroi të sqaronte punën e fustanit të njëjtë me Leonorën. Në fakt të gjithëve u ka bërë përshtypje veshja e këngëtares Gjylbegu në natën e dytë gjysmëfinale e cila ishte identike me atë të Jakupit në “Opinionin” e së mërkurës. “Ishte thjesht rastësi, unë nuk e kisha parë atë puntatë të “Opinion” ndaj dhe ndodhi ky keqkuptim. Nuk ia kam marrë borxh se kam aq para sa për të blerë një fustan”,- tha këngëtarja e njohur shqiptare.

Kantautori Pirro Çako tha se ndihej shumë i lumtur që të gjitha këngët e tij u vlerësuan me çmime. “Ky vit ka qenë shumë i vështirë për mua, por këto këngë më dhanë energji. Kur i pashë tani në skenë u ndjeva shumë mirë”,- tha ndër të tjera Çako dje në “E Diela Shqiptare”. Ai shtoi se ndihet shumë i lumtur që çmimin e mori Redon Makashi dhe kujtoi aty emocionet që kishin në ’89 në festival për të marrë një çmim të parë. Redoni vazhdoi më pas fjalinë duke thënë se Pirro ishte ai që e ngjiti për herë të parë në skenën e Pallatit të Kongreseve. Për Makashin fitimi i çmimit të parë është ende një ëndërr, të cilën ai s’e beson dot që po e jeton.

Gjatë programit të djeshëm morën fjalën të gjithë këngëtarët e ftuar si: Ermal Mamaqi që vazhdoi me humorin e tij edhe në emision, Jonida Maliqi që foli për përjetimet e veçanta të këtij viti ku vinte në duet me të birin (ende të palindur), Leonora Jakupi, Kejsi Tola, Ronela Hajati, Adelina Tahiri, Rozana Radi & Mc Kresha, Big Basta & Anxhelo, Devis Xherahu, Era Rusi. U vu re mungesa e Besa Kokëdhimës, e cila shpresojmë të mos jetë për arsye hatërmbetjeje. Kjo ishte në vija të trasha ajo që ndodhi para dhe pas kuintave të “Këngës Magjike”, gjithsesi për më shumë detaje rreth këtij eventi madhështor të këngës do t’ju tregojmë të shtunën në “Bluetooth”.

Surpriza me emrin Gymysh

Padyshim që mysafirja speciale e këtij festivali, aktorja e famshme turke Gymyshi, do të mbetet surpriza më e bukur e këtij festivali. Bukuroshja e kinematografisë turke që i ka bërë të gjithë shqiptarët të dashurohen me të, dëshmoi gjatë ditës së diel elegancë dhe ëmbëlsi në çdo fjali që tha. Ndonëse të pakta, frazat e dala nga goja e saj, ishin të ëmbla dhe plot lezet. Vetë Gjebrea tha për “Gazeta Shqiptare” se ishte shumë komode dhe kënaqësi e veçantë të punoje me të. Flitet se për të ardhur në Shqipëri Gymyshi ka marrë një tarifë të lartë, diçka më shumë se 30 mijë euro apo e përkthyer në dollarë diku tek 45 mijë të tillë.

Çmimet

Ø Kontributi në Kënga Magjike: Alberie Hadërgjonaj – Vetëm ty
Ø “Best Performance”: Rezarta Shkurta – Të jesh e mirë s’mjafton
Ø “Best Balad”: Devis Xherahu – Akoma s’e besoj
Ø “Best Ft”: Ronela Hajati & Visari – Nelës
Ø Çmimi Televiziv: Era Rusi – Një Lamtumirë
Ø Çmimi Diskografik: Rozana Radi dhe Mc Kresha – Jabadabadu
Ø Magjia e parë: Adelina Tahiri – Mos u kthe
Ø Çmimi i Internetit: Noizy – Shooting Star
Ø “Best Dance”: Ermal Mamaqi – Vetëm beso
Ø “Best Hip Hop”: Big Basta & Angelo – Si Melodi
Ø Çmimi Çesk Zadeja: Jonida Maliqi – Thesar pa emër
Ø Çmimi i Interpretimit: Greta Koçi – Pyes veten
Ø Kënga Hit: Dr. Flori – S’ma ndjen
Ø Çmimi i Kritikës: Besa Kokdhima – Botën do ndryshoja
Ø “Best Lyrics”: Rosela Gjylbegu – Sikur të isha ti
Ø “Best Vocal”: Kejsi Tola – Më jeto
Ø Çmimi Kantautor: Redon Makashi & Arb – Më lër të fle
Ø Çmimi i Pruduksionit: Leonora Jakupi – Këngë e pa kënduar
Ø Çmimi AMC: Olta Boka – Anna
Ø Çmimi Tendencë: Eranda Libohova & Aldo – Pa Problem
Ø Çmimi Kënga Stil: Pirro Çako & Vedat – Bujë vetëm bujë

10 këngëtarët e parë

1 – Redon Makashi
2 – Vedat Ademi & Pirro Çako
3 – Besa Kokëdhima
4 – Rozana Radi & Mc Kresha
5 – Rosela Gjylbegu
6 – Eranda Libohova & Aldon Lipe
7 – Leonora Jakupi
8 – Jonida Maliqi
9 – Kejsi Tola
10 – Ronela Hajati & Visari

Çmimet në lekë

Ø Vendi i parë – 3 milion lekë + 2000 euro nga AMC për videoklip
Ø Vendi i dytë – 3 milion lekë
Ø Vendi i tretë – 1,5 milionë lekë
Ø Vendi i katër deri tek vendi i dhjetë – 1 milionë lekë