Mitet dhe spekulimet gjatë vitit që lamë pas!

Qëkur interneti filloi ekzistimin, ueb-faqet e ndryshme kanë bërë shumë gjëra të bukura për personalitetet e famshme. Veç kësaj na mbajnë vazhdimisht të informuar rreth jetës së atyre që admirojmë, mirëpo nuk janë të rralla edhe thashethemet, madje nga ato që ndoshta nuk do të zinin vend as në rubrikat e humorit. Rrjetet sociale, nga ana tjetër, na kanë bërë t’i duam edhe më shumë idhujt tanë, duke qenë se na bëjnë të ndjehemi sikur jemi pjesë e botës së tyre. Gjatë vitit 2011, spekulimet për të famshmit kanë qenë të vazhdueshme, ndërsa askush nuk e përhap më shpejtë spekulimin sesa interneti.

Vdekjet e rrejshme
Po t’u kishim besuar thashethemeve, atëherë shumëkush nga figurat publike gjatë vitit që lamë pas nuk do të jetonte më. Lady Gaga ishte një nga emrat kryesorë që u bë viktimë e thashethemeve se ka vdekur. Shefi i Playboy, Hugh Hefner, ishte një tjetër viktimë, për të cilin shumëkush besoi se ishte e vërtetë, kur kihet parasysh mosha e tij. As njeriu i skandaleve, Charlie Sheen, nuk u shpëtoi spekulimeve se ka ndërruar jetë. Së fundmi edhe rokeri Jon Bon Jovi u përfol në faqet e thashethemeve, sipas të cilave, kishte vdekur nga infarkti në zemër.

Mashtrimet rreth vdekjes së yjeve të mëdha që në shikim të parë duken të pabesueshme, mirëpo njerëzit nuk kanë besuar edhe kur u kanë thënë se Michael Jackson apo Amy Winehouse kanë ndërruar jetë, por këto rezultuan të vërteta. Prandaj, gjithmonë dyshojnë dhe bien në të njëjtën grackë.

Shtatzënia e Beyonce
Që nga momenti kur Beyonce Knowles njoftoi se ishte duke pritur fëmijë, filluan spekulimet se ajo nuk është shtatzënë. Me fotografi dhe imazhe të ndryshme, faqet e thashethemeve mundoheshin ta dëshmonin bindjen e tyre. Spekuluesit shkuan aq larg saqë thoshin se Beyonce dhe Jay-Z kanë paguar një nënë surrogate për lindjen e fëmijës, ndërsa këngëtarja e luan pjesën e saj të aktrimit.

Michael Jackson është gjallë
Zhanri i të qenit gjallë të legjendave tashmë është i njohur. Njerëzit kanë krijuar mite aq të mëdha, saqë besojnë se disa yje nuk vdesin. Sikurse me Elvis Presleyn, Tupacun e shumë të tjerë, krijuesit e miteve e përhapën fjalën se “Michael Jackson nuk ka vdekur”.

Martesat mashtrueseMartesa e parë e yllit televiziv amerikan Kim Kardashian me basketbollistin Kris Humphries zgjati vetëm 72 ditë. Që nga dita e parë, martesa e tyre është konsideruar si dështim, ndërsa kur ajo mori fund u kuptua se ishte thjesht një spektakël që dinë ta bëjnë personalitetet e famshme për të qenë në qendër të vëmendjes. Britney Spears mori një propozim për martesë nga tashmë i fejuari i saj, Jason Trawick, mirëpo ish-i dashuri i këngëtares, Jason Alexander, ka thënë se mes çiftit në fjalë nuk ka dashuri dhe se gjithçka është mashtrim.

‘Hakimet’
Jo rrallëherë ka ndodhur që faqe të rëndësishme në internet të bien pre e hakerëve, të cilët pasi të marrin kontrollin mbi to publikojnë lajme të ndryshme të pavërteta. Një nga to ishte edhe faqja e Sony Music Ireland, në të cilën u publikua lajmi kinse këngëtarja Rebecca Black është martuar me R. Kellyn. Diçka e ngjashme i ndodhi edhe një portali shqiptar në të cilin u publikua lajmi kinse kryeministri Thaçi është plagosur, dhe një lajm i tillë i rrejshëm u përhap shumë shpejt përmes portaleve tjera dhe rrjeteve sociale.

/Telegrafi/