Mister klikimet në youtube, këngëtarët akuzojnë njëri- tjetrin për mënyrën ilegale të numrit të shikimeve!

E keni vënë re se për një kohë të shkurtër rriten klikimet e klipeve të këngëtarëve duke shkuar në miliona? Por, asnjëherë nuk kemi pyetur se nga mund të arrihen gjithë këto klikime, duke e ditur që jemi një popull i vogël dhe jo të gjithë përdorin internetin, madje mund të thuhet se pak të huaj në Ballkan ose në botë ndjekin dhe përcjellin muzikën shqipe. Këto klikime deri më tani kanë ngelur mister, edhe pse disa herë persona të caktuar e kanë ngritur si çështje shqetësuese. Para disa muajve, këngëtarë të caktuar filluan të hedhin akuza ndaj njëri-tjetrit, duke thënë se klikimet në youtube janë false dhe arrihen në mënyrë ilegale me disa programe të caktuara. Fillimisht ishte produksioni ‘’Entermedia’’ që bashkëpunonte me këngëtarë të njohur në realizimin e klipeve, siç janë Flori Mumajesi, Aurela Gaçe, Elvana Gjata etj., klipet e të cilëve arritën një numër të madhe shikueshmërie, aq sa lirisht thuhej se ky produksion me anë të disa programeve ua rrit numrin e klikimeve këngëtarëve në youtube. Kjo punë është bërë me qëllim që disa këngëtarë të caktuar në skenën shqiptare të marrin epitetin si këngëtarë të kërkuar dhe të popullarizuar dhe shqiptarët kur të dëgjojnë se ‘’x’’ videoklipi ka shumë klikime, ta vizitojnë atë dhe të thonë ‘’hallall’’ për punën që është bërë. Ky shqetësim është ngritur duke bërë krahasim edhe me kanalin tjetër të videove ‘’Dailymotion’’, tek i cili këngëtarët tanë nuk kanë të njëjtin sukses, pasi numri më i madh i klikimeve aty është jo më shumë se 20.000. Është interesante se në Ballkan shumë pak yje kanë miliona klikime, madje as këngëtaret bullgare të cilat dalin si porno yje, nuk kanë aq klikime sa kanë disa këngëtarë tanët. Përveç këtij problemi, një tjetër lajm shqetësuses bëhen dhe të drejtat e autorit, pasi për një këngëtar janë paralajmëruar disa kompani që mbrojnë të drejtat e autorit, duke ‘’luftuar’’ njëri me tjetrin me fshirjen e klipeve. Këto ditë nëpër rrjetet sociale është ngritur përsëri e njëjta çështje, duke thënë se kanë filluar të zbulohen mjetet dhe personat të cilët ndihmojnë në ngritjen e numrit të shikueshmërisë. Ato tregojnë gjithashtu se këngëtarë të caktuar përmes kompanive të ndryshme paguajnë hacker-a nga Azia, të cilët ndihmojnë në rritjen e klikimeve për klipe të caktuara. Dhe, po t’u hedhim një sy klipeve të tjera, nuk arrihet numri as 50.000 klikime, dhe duke bërë një analizë, ato klipe janë realizuar nga po të njëjtët këngëtarë.