Maqedoni-Shqipëri, vetëm me lëtërnjoftime!

Qeveria e Republikës së Maqedonisë ka miratuar projektligjin për ratifikimin e Marrëveshjes midis Qeverisë së Maqedonisë dhe Këshillit të ministrave të Republikës së Shqipërisë për lëvizjen e lirë të shtetasve të dy vendeve.

Me këtë marrëveshje, qytetarët do të mund të kalojnë kufirin ndërshtetëror me letërnjoftime biometrike. Ky projektligj të hënën do të dërgohet në Kuvend, ku duhet të marrë miratimin e fundit para se të hyjë në fuqi.

Marrëveshja u arrit gjatë vizitës së fundit të kryeministrit shqiptar, Sali Berisha në Maqedoni, kurse formalisht u nënshkrua në dhjetor të vitit të kaluar nga ana e dy ministrive të Jashtme. Kjo marrëveshje do të thellojë edhe më tepër bashkëpunimin mes Maqedonisë dhe Shqipërisë. Më së tepërmi pritet të përfitojë turizmi, pasi turistët nga Maqedonia vite me radhë përbëjnë numrin më të madh të turistëve që pushojnë në Shqipëri.

Lëvizja Qytetare Zgjohu këtë vendim të Qeverisë së Maqedonisë e ka vlerësuar si një arritje të madhe që bartë me vete simbolikën e bashkimit të tyre, në frymën evropiane, në vigjilje të shënimit institucional dhe të përbashkët të 100 vjetorit të Ditës së Flamurit dhe të Pavarësisë së Shqipërisë. BotaSot