Sulmi në Afganistan, krerët e shtetit vizitojnë familjen e Kapiten Voglit

Presidenti i Republikës, Bamir Topi, kryeministri Sali Berisha, kreu i
opozitës Edi Rama dhe kryeparlamentarja Jozefina Topalli zhvilluan
vizita ngushëllimi në familjen e Kapitenit Feti Vogli, i cili humbi
jetën në Afganistan, një ditë më parë.

Presidenti Topi, i
shoqëruar nga Shefi i Shtabit të Përgjithshëm, Xhemal Gjunkshi i shprehu
personalisht famijes Vogli pikëllimin e thellë për humbjen e jetës së
djalit të tyre të rënë në krye të detyrës. Kreu i Shtetit vuri në pah
aktin sublim e heroik të dëshmorit shqiptar në mbrojtje të vlerave të
lirisë e demokracisë nëpër botë.
“Padyshim, ishte një kurth që iu bë
Forcave, por në një mision shumë të moralshëm, së bashku me Forcat
amerikane, qoftë Kapiten Vogli, ose Nëntetar Peci, demonstruan që ishin
në një mision, të cilin ne e kemi vlerësuar në kuadër të Aleancës më të
madhe të Paqes e të Sigurisë, mision të cilin do ta vazhdojmë për të
qenë kurdoherë së bashku me aleatët. Unë këtu, sikurse thashë, shpreha
ngushëllimet për humbjen e Kapiten Voglit, por nga ana tjetër dëshiroj
të shpreh besimin për një shërim të shpejtë të Nëntetar Pecit.”- u
shpreh presidenti, duke iu përgjigjur interesimit të mediave pasi
përfundoi vizitën në familjen e kapitenit.