Elita 5 së shpejti me album të ri!

Rok-grupi i njohur Elita 5 ka nisur punën intensive për albumin e ri, që pritet të jetë me shumë befasi. Sipas solistit të grupit Arif Ziberi, ky album do të ketë shumë risi ngase po punohet me mjaft përkushtim dhe do të ketë dhjetë këngë me tematika të ndryshme. “Jemi në përgatitje të albumit të tetë me radhë, i cili do të ketë 10 këngë. Është duke u bërë një punë e madhe në këtë album, dhe secila këngë përmban tekste të aktualitetit dhe me motive të ndryshme. Por natyrisht që në to do të mbizotërojë tema e dashurisë”, ka thënë Arifi për “Zëri”. Albumi do të lansohet paralelisht edhe me tri videoklipe të cilat Elita 5 nuk ka vendosur ende se më cilin produksion do t’i punojnë. “Kemi menduar që albumi t’i ketë edhe tri videoklipe, mirëpo tani për tani nuk mund të flas për to, sepse jemi në fazën fillestare të punës dhe asgjë nuk kemi të sigurt. Sido që të jetë uroj që albumi dhe klipet të pëlqehen në publik”, shtoi ai. Elita 5 sapo ka përfunduar një sërë koncertesh në Shqipëri, dhe ata edhe më tej do të vazhdojnë pjesëmarrjet e tyre nëpër vendet ku i kërkon publiku.