Femrat finaliste të “X Factor”: Ju rrëfejmë dashuritë tona në jetën reale!

Ato tashmë quhen finaliste dhe ia ndiejnë rrezikun njëra-tjetrës në ethet e garës për kupën “X Factor”, që po transmetohet në “Tv Klan”. Janë shtatë finalistet vajza që kanë prekur famën, aq sa kanë krijuar grupe fansash që duan të dinë më shumë për to. Tri vajzat e para janë konkurrente të kategorisë mbi 23 vjeç dhe udhëhiqen nga Vesa Luma, ndërsa të tjerat janë kategoria vajza që trajnohen nga Juliana Pasha. Në show nuk kanë mundësi të thonë shumë për veten, ndaj për herë të parë për “Panorama Plus” zbulojnë dashuritë e tyre në jetën reale që i mbështesin në këtë “reality show”, me regji të Vera Grabockës e që prezantohet nga Alketa Vejsiu.

Lirije Rashiti: Ai që më mbështet, është bashkëshorti im
Lirija është e martuar dhe madje nënë e dy fëmijëve. 30-vjeçarja nga Gjilani pohon se “në këtë sfidë për muzikën ai që më mbështet është bashkëshorti im. Ai është i pari person në jetën time jashtë spektaklit që më suporton dhe madje, nëse nuk do ishte ai pro meje, nuk do të isha këtu. Gjithë mbështetjen unë ia kthej me një interpretim të bukur në skenë, atij dhe fëmijëve të mi për të cilët më merr malli”.

Besa Breca: Shoqëria është treguar besnike në këtë garë
Besa është 24 vjeçe nga Fieri dhe garon në kategorinë mbi 23 vjeç në “X Factor”. Vajza që prej vitesh jeton në Tiranë, ka pohuar se në këtë garë “këndoj vetëm për familjen time dhe veçanërisht për dy prindërit e mi”. Ajo shton se i ka bërë përshtypje që jo vetëm familja por dhe miqtë që ajo ka në jetë, e kanë ndjekur me besnikëri rrugëtimin e saj në këtë garë. ”Familja dhe shoqëria ime kanë qenë dhe natën e parë në sallë dhe duartrokitjet e tyre më kanë dhënë mjaft zemër”, ka pohuar ajo.

Matilda Shushari: Më mbështet i dashuri
Matilda është 24 vjeç dhe një nga vajzat, që pohon se paralelisht me këtë garë po përjeton dhe dashurinë e saj. Studentja e shkencave kompjuterike pohon se “jam e dashuruar dhe në ‘X Factor’ këndoj për të gjithë njerëzit e zemrës sime, të dashurin që më mbështet, familjen, shoqërinë. Në natën e parë më kanë gëzuar pa masë, sidomos me pankartat që më kishin dedikuar dhe tifon që më bëjnë live në sallë dhe në rrjetet sociale”, ka theksuar Matilda.

Sheila Haxhiraj: Në facebook të gjithë më pyesin a jam e lidhur
18-vjeçarja nga Tirana ka bërë përshtypje për pamjen dhe sharmin e saj. “Njerëzit që gjithmonë më frymëzojnë janë familja dhe miqtë e mi më të ngushtë”, thotë Sheila. Ndërkohë që në lidhje me vëmendjen dhe zhurmën që ka krijuar në publik pas shfaqjes së saj në ekranin e ‘Tv Klan”, ajo pohon se “numri i fansave në facebook është rritur shumë dhe personalisht kam marrë mjaft komente pozitive, ndërsa më pyesin nëse jam e lidhur. Të gjithëve u them që jam në dashuri me muzikën dhe shpresoj të jem sa më shumë javë në skenë, që ta ndaj këtë dashuri me publikun”, thotë ajo.

Festina Mejzini: Në “x factor” kam bërë për vete shumë fansa djem
Është vetëm 18 vjeç dhe vjen nga Gjakova, ndërsa trajnohet në këtë garë nga Juliana Pasha. “Interpretimin tim ia dedikoj gjyshit, i cili ka qenë muzikant”, thotë ajo. Matilda tregon se “kam pasur në sallë për të më ndjekur familjen, e cila më ka dhuruar shumë dashuri, dhe falënderoj gjithashtu shoqërinë që kishte ardhur posaçërisht nga Gjakova për mua”. Më tej, ajo shton se “ajo çfarë më bën përshtypje, është se fansat kanë filluar tashmë të shtohen dita-ditës në facebook që tani, dhe më vjen mirë që më së shumti janë djem (qesh).

SAVJANA VJERDHA: “KAM MARRË KOMPLIMENTE NGA ARTISTË TË FAMSHËM”
Savjana është 15 vjeç dhe duket e frymëzuar për ta çuar garën shumë më tej. “Mbërritjen në finale ia dedikoj familjes sime dhe personit të veçantë që është vëllai im, i cili më ka mbështetur në çdo aspekt. Kam marrë shumë komplimente nga miq dhe artistë të famshëm në vend këto ditë dhe jam ndier vertët e privilegjuar”, thotë ajo.

Xhesika Polo: “Si 14 vjeç, këngën e këtij show ua dedikoj jetimëve”
Është vetëm 14 vjeç e gjysmë dhe natyrisht që ethet e një gare janë më të forta për të. Xhesika pohon se “arritjen time në finale gjithmonë ia dedikoj familjes sime që më ka ndjekur në çdo hap, gjithashtu shoqërisë që është pjesë e rëndësishme e jetës sime, dhe gjyshërve që më mungojnë. Këngën e kësaj të diele ua kushtoj fëmijëve jetimë në gjithë botën, pasi për ta flet kënga”, thotë ajo.

PanoramaPlus