F1 rrezikon ndarjen

Formula 1 është zhytur në krizën e saj më të madhe në 60 vjet, pasi tetë nga 10 ekipet kanë njoftuar për planet e krijimit të një kampionati të tyre. Asociacioni i ekipeve FOTA ka thënë se BMW-Sauber, Brawn, Ferrari, McLaren, Red Bull, Renault, Toro Rosso dhe Toyota janë të bashkuar në vendim për ndarjen e sportit në dysh.

“Ekipet nuk mund të vazhdojnë në shkeljen e vlerave të rëndësishme të sportit dhe kanë vendosur të refuzojnë paraqitjet e kushtëzuara për kampionatin e vitit 2010”, thuhet në komunikatë. “Këto ekipe nuk kanë alternativë tjetër përveç të krijojnë një kampionat të ri që reflekton vlerat e garuesve dhe partnerëve të saj”.

Federata Ndërkombëtare e Automobilizmit (FIA) ka njoftuar se të premten ka qenë afati i fundit që ekipet të bëjnë regjistrimin apo të rrezikojnë ta humbin vendin nga garues të rinj.

Tetë ekipet nga FOTA kishin paraqitur regjistrim të kushtëzuar nën rregullat e vitit 2010, të përfshirë me kufizimin buxhetor kanë kërkuar ndryshime në marrëveshjen e re komerciale të sportit.

Përpjekjet nga të dyja anët për të arritur kompromis dështuan dhe FIA akuzoi ekipet se dëshirojnë të marrin kontrollin e sportit. FOTA ka thënë se kampionati i ri do të joshë më tepër garues, do të vlerësojë dëshirat e tifozëve dhe do të ketë udhëheqje transparente.

Ekipet që të dielën do të marrin pjesë në garën për Shpërblimin e Madh të Britanisë po ashtu kanë premtuar “çmime më të lira të biletave, partnerë dhe aksionarë të rëndësishëm.
Pilotët më të mirë, sponsorët, promotorët dhe kompanitë historikisht të lidhura me shkallën më të lartë të sportit të gjithë do të paraqiten në serinë e re”.

Mbetet të shihet nëse ekipet e reja të regjistruara për sezonin e ardhshëm do të jenë të interesuara të garojnë në kampionat në mungesë të ekipeve të famshme si Ferrari dhe McLaren. FOTA do të ketë mjaft opsione për të formuluar kalendarin sezonal, pasi Formula 1 ka larguar disa pista në Evropë dhe Amerikë dhe në vend të tyre ka përfshirë garat në Lindjen e Mesme dhe Azi.