FIFA përjashton Shqipërinë

FIFA ka pezulluar pa afat nga të gjitha aktivitetet futbollistike ndërkombëtare Shqipërinë, pas përplasjes mes Federatës Shqiptare të Futbollit dhe Ministrisë së Turizmit, Kulturës, Rinisë dhe Sporteve. Komiteti Ekzekutiv i këtij institucioni, në mbledhjen e tij të djeshme ka vendosur masën ekstreme ndaj futbollit shqiptar, që tani e tutje do të qëndrojë jashtë aktiviteteve ndërkombëtare. Me pak fjalë, do të thotë fund i top-këmbës, duke qenë se ai nuk mund të luhet vetëm brenda vendit. Faksi i dërguar mbrëmë në adresë të FSHF-së, i firmosur nga sekretari i përgjithshëm i FIFA-s Zherom Valke, shkruan se “FSHF në dy vitet e fundit është bërë objekt i ndërhyrjeve të shpeshta të qeverisë në punët e saj të bren-dshme”. “Këtu përfshihet auditimi, fushata shpifëse ndaj presidentit të Federatës për shitje ndeshjesh e bërë nga ministri në detyrë i sporteve dhe refuzimi i firmosjes së Statutit të këtij institucioni, në mënyrën e aprovuar më parë nga FIFA dhe UEFA”, shkruhet në faksin e ardhur dje pas mbledhjes së Komitetit Ekzekutiv të FIFA-s. “Ministria e Sporteve ka cënuar pavarësinë e marrjes së vendimeve nga FSHF, duke mos marrë parasysh paralajmërimet e bëra nga FIFA dhe UEFA me anë të letrave të mëparshme”, thuhet më tej në faksin e sekretarit Zherom Valke. Ky faks ka mbërritur dje rreth orës 19.30 në zyrat e Federatës Shqiptare të Futbollit dhe i adresohej sekretarit të përgjithshëm Arben Bici. Fuqia e tij pezulluese mund të ndryshojë vetëm me një vendim tjetër të Komitetit Ekzekutiv, por pasi shteti shqiptar të ketë plotësuar kushtet.

Dënimi

FIFA pati bërë të ditur që në fund të muajit shkurt se deri në datën 14 mars duhej të plotësoheshin të tre kushtet e bëra të ditura prej saj dhe që lidheshin me firmosjen e Statutit, me provimin e akuzave ndaj presidentit Duka si edhe me tërheqjen e auditimit. Por, një gjë e tillë nuk ndodhi dhe vetëm dy ditë më parë, drejtoresha e sporteve në Ministri, Violeta Shqevi, deklaroi se ky institucion i pati plotësuar kushtet e vendosura nga FIFA. Një gjë e tillë megjithatë nuk është marrë parasysh dhe në mbledhjen e djeshme të Komitetit Ekzekutiv është vendosur pezullimi pa afat nga të gjitha aktivitetet ndërkombëtare i Federatës Shqiptare të Futbollit. Një gjë e tillë do të thotë se Shqipëria nuk do të mund të luajë në eleminatoret e kampionatit botëror të vitit 2010, ndërsa klubet nuk do të kenë mundësi të marrin pjesë në Kupat e Evropës në muajt e verës. Gjithashtu, nuk do të mund të luhet as miqësorja me Moldavinë më 26 mars. Sigurisht që e gjithë kjo do të krijojë një presin të madh mbi MTKRS-në, ndonëse dje ministri Pango nuk preferoi të bënte komente. Kreu i FSHF-së Duka e quajti shumë të rëndë vendimin, por nga ana tjetër, të drejtë, duke parë sesi ishte duke shkuar ky konflikt që tashmë ka më shumë se tre vjet që ka nisur.