“President konsensual”, Fule mesazh Berishës: Procesi, test për statusin kandidat!

Fule, Ramës: Dera e BE e hapur për Shqipërinë, meritojeni

Fule flet në Kuvend: E ardhmja e Shqipërisë është në BE

Topalli pret Fulen: Opozita ka hequr dorë nga bllokimi dhe bojkoti

Topi pret komisionerin Fule: Presidenti i ri të jetë mbi partitë politike

TIRANE–Kryeministri Sali Berisha doli para medias në një konferencë shtypi pas takimit që pati me Komisionerin evropian për zgjerimin dhe fqinjësinë e mirë Stefan Fule. “Unë e njoha komisionarin Fule me progresin e bërë në të gjitha rrafshet, në reformën zgjedhore, në reformën e kodeve, në reformën në drejtësi ku javën e ardhshme pritet votimi i Gjykatës Administrative. Duket se po vihemi në një valë për heqjen e imuniteteve. Ne kemi qenë për mosprekje të Kushtetutës për imunitetet por kemi ndryshuar qëndrimin dhe pranojmë çdo variant që kërkon opozita”, u shpreh Berisha.

Berisha tha se ka diskutuar edhe për axhendën e ngjeshur të përmbushjes së 12 prioriteteve. “Diskutuam edhe për zgjedhjen e Presidentit të Republikës dhe unë e sigurova komisionarin si një proces që do të kalojë domosdoshmërisht me negociata. Proces që duhet të respektojë frymën dhe gërmën e Kushtetutës. Proces për të cilin do të angazhohemi në kohën e përcaktuar nga Kushtetuta e vendit. Kandidatë siç e dini ka dhe janë shumë të mirëpritur por procesi fillon në afatin e përcaktuar nga Kushtetuta e vendit”, theksoi Berisha.

Komisioneri Stefan Fula tha se kishte ardhur në Tiranë jo për të diskutuar në lidhje me të kaluarën por për të ardhmen. Ai këmbënguli se Bashkimi Evropian është e ardhmja për Shqipërinë dhe bëri thirrje për zbatimin e marrëveshjes së nëntorit ashtu sikurse për adresimin e prioriteteve të Komisionit Evropian në atë çka njihet si plani i veprimit.

“Ne diskutuam edhe për zgjedhjen e Presidentit të ardhshëm të Shqipërisë. Kemi gjetur mirëkuptim për dy gjëra të rëndësishme sipas nesh. Së pari kjo ka të bëjë me vendosmërinë dhe angazhimin e qeverisë dhe nga ana tjetër angazhim i Partisë Socialiste që e mora edhe nga zoti Rama për reformën zgjedhore dhe reformën parlamentare. Së dyti angazhimi i kryeministrit dhe qeverisë që të sigurohemi që zgjedhja e Presidentit do të jetë një proces i negociueshëm. Nuk kam ardhur për të bërë ndonjë këshillë se si duhet bërë pasi kjo është një çështje e juaja. Në të njëjtën kohë dua të them se zgjedhja e Presidentit duhet të çojë në zgjedhjen e një personi që respekton frymën e Kushtetutës dhe atë çka ajo thotë për unitetin e popullit”, theksoi Fule.

Në lidhje me ftesën e kreut të PS, edi Rama për tu ulur në tryezë bisedimesh për presidentin e ri, kreu i qeverisë Berisha, tha se:

Çdo ftese i përgjigjem pozitivisht. Por theksoj se Kushtetuta përcakton një afat se kur nis procesi kushtetues dhe ne, si unë dhe zoti Rama për hir të respektit të postit të Presidentit duhet ta respektojmë këtë. Siç fakton e gjithë kjo histori e gjatë komunikimi, takimet duhen parapërgatitur nga stafet që kanë mundësi të japin një kontribut thelbësor në përgatitjen e tyre.