5 Maji, Rama vendos lule tek “Nëna Shqipëri”, Berisha: Flijuan jetën për lirinë tonë!

Me rastin e festës së 5 Majit, krerët më të lartë të shtetit dhe politikës kanë nderuar dhe vendosur lule në memorialin “Nënë Shqipëri” tek “Varrezat e Dëshmorëve”. Kryeministri Sali Berisha, kryetarja e Kuvendit Jozefina Topalli, kryebashkiaku i Tiranës, Lulzim Basha ishin të parët që nderuan dëshmorët dhe vendosën kurora me lule.

“Kjo është një ditë në të cilën fjalët kurrë nuk mund të shprehin atë që ndien zemra dhe shpirti për të gjithë ata të cilët flijuan jetën, rininë, gjithçka që ne sot të festojmë 100-vjetorin e Shqipërisë së pavarur të lirë kudo që ndodhemi në trojet tona.”- u shpreh kryeministri.

Secili prej tyre që prehet sot në flamurin e kombit, vijoi Berisha, kur vështron vendin e tij që 100 vjet më parë përpëlitej midis ekzistencës dhe mos ekzistencës si shtet, shikon sot një Shqipëri anëtare të NATO-s dhe që rend me ritmet më të shpejta për të kapur shekujt që iu grabiten nga diktaturat dhe pushtimet. Shqiptaret janë të lirië, të sigurt në të ardhmen e tyre.

Homazhe dhe vendosje kurorash bëri pak orë më pas edhe kryetari i opozitës Edi Rama i cili gjithashtu i shoqëruar nga eksponentë të opozitës ishte në “Varrezat e Dëshmorëve” duke uruar festën e dëshmorëve.