Me 2 pije energjike në ditë, rrezikoni jetën!

Një adoleshent që pi gjatë ditës dy pije energjike, vë në rrezik shëndetin e tij, sidomos atë të zemrës dhe kockave. Alarmin për një dukuri të tillë e ka lëshuar Gianni Zuccotti, nga Komiteti italian i Sigurisë Ushqimore, i cili e ka prezantuar atë edhe gjatë një kongresi të posaçëm për shëndetësinë që u zhvillua në Romë. Ai iu referua tezës së tij, duke përmendur dëmin që shkakton përbërësi i kafeinës, e cila në këto pije rezulton të jetë në sasinë prej 50 në 500 mg, dozë kjo që konsiderohet si shumë e lartë për një të ri të moshave të hershme. “Vetëm dy pije energjike në ditë, - tha Zuccotti, - janë të mjaftueshme për të kapërcyer pragun e tolerancës. Kafeina e tepërt, më pas, mund të shkaktojë probleme në qarkullimin e gjakut, si edhe ndërhyn në thithjen e kalciumit prej kockave." Por sipas tij, substanca të tjera të rrezikshme që përmbahen në këto pije, janë edhe taurinat, të cilat mund të shkaktojnë diarre, hipertension, takikardi dhe hipotermi. (Noa)