PD-PS vendosin sot për pikat kryesore të reformës zgjedhore!

Tiranë, 15 maj 2012, NOA - Komisioni për Reformën Zgjedhore do të përcaktojë në mbledhjen e sot miratimin ose jo të disa prej pikave kryesore që lidhen me zgjedhjet e ardhshme.

Teknologjia e zgjedhjeve, formatimi i KQZ-së dhe procedurat që lidhe me rekomandimet e OSBE/ODIHR pritet të diskutohen sot në mbledhjen e Komisionit të Reformës. Takimet e fundit të komisionit janë shoqëruar me debate të ashpra nga dy kampet kryesor politike, për ndryshimet në Kodin Elektoral.

Pika më e debatueshme lidhet me formatimin e KQZ. Zgjedhja e anëtarit të shtatë të këtij institucioni ka sjellë dhe mungesën e konsensusit. PS-ja propozon që KQZ-ja e re të nisë punën menjëherë sapo të miratohet në Parlament. Demokratët theksojnë se anëtarët aktualë të KQZ-së kanë mandat deri në dhjetor. Në mbledhjen e djeshme, komisioni miratoi disa nga kapitujt që kanë të bëjnë me regjistrimin e subjekteve politike, me fushatën, median dhe financimin e partive politike.

a.k/noa.al