Konfirmohet: 12 të vdekura, 2 në gjendje të rëndë!

Shkon në 12 numri i viktimave nga aksidenti i rëndë në Himarë në Qafën e Vishës rreth orës 16:00, ku një autobus me afro 33 studente të nisura nga Elbasani për ekspeditë mësimore, u aksidentua. Në një prononcim të pak çasteve më parë një mjek nga Spitali Ushtarak konfirmoi edhe viktimën e 12-të duke thënë se krahas 11 viktimave të konfirmuara, njëra nga vajzat e transportuara me helikopter kishte mbërritur e vdekur në spital, pasi kishte humbur jetën rrugës. “11 të dëmtuara kanë mbërritur në Spitalin Ushtarak, njëra prej tyre ndërroi jetë në fluturim. Çdo i aksidentuar ka dy mjek dhe dy infermierë mbi kokë, po u bëhet gjithë shërbimi i nevojshëm dhe nëpërmjet ekzaminimeve ne po saktësojmë dëmtimet e gjithsecilit. Nga të plagosurat e tjera që kanë ardhur në spital, 2 janë në gjendje të rëndë, ndërsa priten edhe 4 të tjera të mbërrijnë”, u shpreh mjeku, raporton noa.al.

Ndër të tjera ai tha se gatishmëria është absolute, pasi mbi 60 mjekë dhe 120 infermiere janë në dispozicion.

Mjeku theksoi se në spital fatmirësisht ka rezerva gjaku, ku mbi 60 studentë kanë dhuruar gjak, ndërsa 40 ushtarë po dhurojnë gjak tani.

Sakaq zv.ministri i Shëndetësisë Bardh Spahia deklaroi nga Spitali Ushtarak se gatishmëria e gjithë spitaleve në zonat e përfshira është e jashtëzakonshme, ndërsa shtoi se ndihma do jetë në vijimësi.

a.y/noa.al