Kuvendi nis procedurën: Më 30 maj votimi i parë për zgjedhjen e Presidentit!

Kuvendi vendosi sot që votimi i parë për zgjedhjen e Presidentit të bëhet më 30 maj, pra të mërkurën e ardhshme, në një seancë të posaçme, raporton agjencia e lajmeve NOA.al.

Vendimin e Konferencës së Kryetarëve, e mbledhur paraditen e sotme për nisjen e procedurave për zgjedhjen e Kreut të ri të Shtetit, e bëri publik kreu i grupit parlamentar të PD-së Astrit Patozi.

Patozi theksoi se Konferenca e Kryetarëve ra dakord që Kuvendi të mblidhet më 30 maj për votimin e parë, sipas neneve 86, 87 dhe 88 të Kushtetutës.

Ai tha se u zgjodh një datë e posaçme për t’u mbledhur në mënyrë që kjo procedurë të mos ndikojë në punimet e Kuvendit.

Kreu i grupit të demokratëve u shpreh se mazhoranca nuk e ka përjashtuar konsensusin, që shpreson të arrihet me të gjitha palët më 30 maj.

Sipas tij në rast se kandidati për president nuk do të marrë shumicën e votave në votimin e parë, Kuvendi do të mblidhet sërish siç e para shikojnë nenet 86, 87 dhe 88 të Kushtetutës në votimin e dytë, të tretë, të katërt apo të pestë, për zgjedhjen e Presidentit të Republikës.

Rregullorja e Kuvendit në nenin 109 të saj përcakton se Presidenti i Republikës zgjidhet në përputhje me nenet 86, 87 dhe 88 të Kushtetutës, me votim të fshehtë dhe pa debat.
Po sipas këtij neni, pritet që Konferenca e nesërme e Kryetarëve të caktojë datën e kryerjes së votimit për çdo raund votimi të përcaktuar në Kushtetutë, ku sekretariati për Procedurat dhe Votimet është komisioni i votimit, i cili në këtë rast organizon dhe shpall publikisht rezultatin e votimit.

Sipas rregullores, Komisioni për Çështjet Ligjore, Administratën Publike dhe të Drejtat e Njeriut shqyrton nëse kandidatët për presidentë i plotësojnë kushtet e përcaktuara në Kushtetutë dhe i paraqet raportin seancës plenare, sipas afatit të përcaktuar nga Konferenca e Kryetarëve.

Pika e tretë e këtij neni përcakton se “Presidenti i Republikës zgjidhet me një shumicë prej jo më pak se tri të pestat e të gjithë anëtarëve të Kuvendit në votimin e parë, votimin e dytë ose votimin e tretë. Në votimin e katërt dhe në votimin e pestë zgjidhet President kandidati që siguron më shumë se gjysmën e votave të të gjithë anëtarëve të Kuvendit.
Votimi quhet i kryer edhe kur në konkurrim nuk paraqitet asnjë kandidat”, përcaktohet në Rregulloren e Kuvendit.

Sipas nenin 88 të Kushtetutës, votimi i parë për zgjedhjen e Presidentit zhvillohet jo më vonë se 7 ditë nga fillimi i procedurës.

Në votimin e parë, të dytë dhe të tretë për zgjedhjen e Presidentit kërkohen shumica prej tri të pestave të votave të deputetëve.

Në rast se në votimin e parë, të dytë apo të tretë kandidati për president nuk arrin të marrë 3/5 e votave atëherë Konferenca e Kryetarëve vendos datën e katërt të votimit, që zhvillohet jo më vonë se 7 ditë nga kryerja e votimit të tretë.

Ndërkohë në votimin e katërt dhe të pestë kandidati për president që të zgjidhet duhet të marrë shumicën e votave të të gjithë anëtarëve të Kuvendit.

Rregullorja e Kuvendit përcakton se në rast se edhe në votimin e pestë asnjë kandidat nuk siguron shumicën e kërkuar, ose kur pas votimit të katërt pa sukses nuk paraqitet asnjë kandidaturë e re, Kryetari i Kuvendit shpall shpërndarjen e Kuvendit, dhe është pikërisht Kuvendi pasardhës ai që zgjedh Presidentin e Republikës me shumicën e votave të të gjithë anëtarëve të tij.

mit/noa.al