Sot, Dita Ndërkombëtarë e Fëmijëve!

Fëmijët janë sot në qendër të vëmendjes. Një sërë aktivitetesh zhvillohen sot në kopshtet e shkollat e vendit për Ditën e Fëmijëve. Në Tiranë, një aktivitet me performanca artistike kushtuar fëmijëve është parashikuar të zhvillohet në bulevardin kryesor. Aktiviteti është organizuar nga Ministria e Turizmit, Kulturës, Rinisë dhe Sporteve, në bashkëpunim me Bashkinë e Tiranës dhe Drejtorinë Arsimore Rajonale të Tiranës, si dhe nën kujdesin e zonjës Liri Berisha. Për realizimin e këtyre aktiviteteve janë angazhuar 5 shkolla të kryeqytetit ku jane përfshirë dhe artistët e vegjël të Cirkut Kombëtar dhe Teatrit të Kukullave. Sheshet ku do të organizohen performancat artistike janë: sheshi tek Pedonalja, sheshi para portës hyrëse të Kalasë së Tiranës, sheshi para Galerisë së Arteve, sheshi midis GKA-së dhe hotel “Dajtit”, sheshi përpara lulishte “Milenium”, sheshi këndor tek “Këmbana e Paqes” si dhe sheshi para hyrjes së Qendrës Ndërkombëtare të Kulturës. Gjithashtu, aktivitete do të ketë edhe tek Parku Rinia, lulishtja “3 Vëllezërit Frashri”, si dhe tek sheshi para Kryesisë së Kuvendit.

Politika pritet t’u bashkohet festimeve të të vegjëlve rreth mesditës. Në sheshin para Pallatit të Kongreseve do të zhvillohet një aktivitet me nxënësit e shkollës artistike “Jordan Misja”, Shkollës Koreografike dhe Qendrës Kombëtare Kulturore të Fëmijëve, në të cilin do të marrë pjesë edhe kryeministri Berisha. / G.N. Shekulli


Me aktivitete të ndryshme shënohet sot edhe në Kosovë 1 qershori dita ndërkombëtare e fëmijëve. Me këtë rast Kuvendi i Kosovës do të mbajë një seancë plenare. Ndërsa institucioni i Avokatit të Popullit organizon tryezen me temën ”Stop diskriminimit të fëmijëve nëpër shkolla”.

Po sot, Ministri i Kulturës, Rinisë dhe Sportit, Memli Krasniqi, do të takohet dhe zhvillojë një lojë shahu me talentin pesëvjeçar në këtë sport, Elhami Gerbeshi.

Kurse, kyetari i Prishtinës, Isa Mustafa, do t’i bëjë vizitë fëmijëve në institucionin parashkollor “Ardhmëria” në kryeqytet.

Kjo ditë ka qëllim të sensibilizimit të shoqërisë për të parandaluar abuzimin me të drejtat e fëmijëve.

1 Qershori, Ditë Ndërkombëtare të Fëmijëve, e ka origjinën nga Shtetet e Bashkuara të Amerikës dhe Kina.

Shume vende të botës e kanë pranuar këtë si festën ndërkombëtare të fëmijëve dhe për këtë qëllim realizojnë festime të larmishme. /BotaSot/