Shqipëria në hartën e kinemasë botërore

Një bashkëpunim i “Deutsche Telecom” me regjisorin e njohur Asger Leth dhe yllin e kinemasë Mads Mikkelsen sjell një lloj unik kinemaje, me filmin “Move On”, që përfshin pjesëmarrjen e publikut në role qendrore, gjatë xhirimeve të cilat do të përfshijnë edhe Shqipërinë mes koordinimit të AMC. Shqipëria nuk është e thënë të përfshihet në filma vetëm si vend i çuditshëm, apo mes personazhesh negative. Ky është një rast krejt i ndryshëm me përvojën e shfaqjeve të deritanishme në produksione filmike. “Deutsche Telecom” ka ndërmarrë një nismë unike, duke krijuar një film të vërtetë të kalibrit ndërkombëtar, “Move On”, nën drejtimin e regjisorit të mirënjohur Asger Leth, fitues i çmimeve ndërkombëtare dhe yllin hollivudian Mads Mikkelsen.

Ky i fundit është i njohur për rolet befasuese në filma si “Casino Royale”, “Tre Musketierët”, “Përbindëshat kundër Alienëve” dhe “Përplasja e Titanëve”. Projekti në fjalë, i cili është njoftuar edhe përmes një komunikate zyrtare për median nga “Cannes Film Festival” përfshin një numër të konsiderueshëm vendesh, si: Shqipëria, Austria, Bullgaria, Kroacia, Republika Çeke, Gjermania, Hungaria, Holanda etj. “Move On” është filmi i parë i këtij lloji, duke qenë se është i pari film interaktiv në botë, ku publikut i kërkohet të bashkëveprojë duke u bërë protagonist.

E veçanta e këtij projekti të madh filmik është se AMC, si pjesë e Grupit “Deutsche Telecom”, po mundëson në Shqipëri përfshirjen e publikut përmes faqes së dedikuar të internetit: https://move-on-film.al/.
Kështu, publiku shqiptar mund të propozojë krahas vendeve të tjera, rolin e aktores kryesore, një nga kolonat zanore, një kafshë shtëpiake për të marrë pjesë në film, faqen e parë të një gazete me një lajm tërheqës, “Një rol për ty” (për veten), “Portreti i yllit tuaj në film” (poster apo diçka tjetër), si dhe të ndajnë një udhëtim në tren me Mads Mikkelsen. Gazeta Shqiptare