Autobusi në humnerë, ja pse ndodhi dhe detajet e ngjarjes!

Aksidenti që ndodhi sot në zonën e Petreshit, në rrugën kombëtare Tiranë-Elbasan, ka shkaktuar plagosjen në shkallë të ndryshme të rreth 10 personave dhe lëndimin e 20 të tjerëve, si pasojë e rënies në humnerë të mjetit interurban që kryente udhëtimin nga kryeqyteti në drejtim të Librazhdit. NOA.al raportoi e para lajmin dhe raportoi minutë pas minute duke transmetuar e para edhe pamjet nga vendngjarja, dërguar nga bashkëpunëtori i NOA.al, Tom Dodbiba.

Çfarë ndodhi

Pasditen e së shtunës, një grup rreth 35-40 vetë, kryesisht të rinj, nga Librazhdi, po ktheheshin me autobusin tip Benz prodhim i vjetër me targa LB 31 56 A.

Ata morën pjesë në Tiranë në Kongresin e parë mbarëkombëtar të partisë Aleanca KuqeZi dhe po i riktheheshin vendbanimeve.

Befas teksa gjendeshin pasi kishin kaluar Kërrabën, afër fshatit Petresh, tek vendi u quajtur Qershitë, ku pranë gjenden antenat e përsëritësve televizivë, ora 16:42 u përballën me aksident.

Sipas raportimit nga vendngjarja, autobusit i ka prerë rrugën një fuoristradë tip Range Rover e zezë me targa Tirane. Autobusi plot me udhëtarë ka dalë nga rruga duke dashur të shmangë përplasjen me makinën tjetër por ka humbur kontrollin dhe në të majtë të rrugës ka dalë prej saj duke u rrokullisur në humnerë deri 30 metra lartësi.

SHIKONI FOTOT TE GALERIA

Për fat të mirë, rënia nuk hasi në gurë shkëmborë por pemë dhe kjo nuk shkaktoi plagosje fatale të paktën deri në të dhënat më të fundit. Ju po shikoni katër foto nga vendngjarja të bashkëpunëtorit të NOA.al.

“Në vendngjarje u krijua një situatë kaotike ku në ato minuta shumë makina ndaluan dhe disa njerëz kërkuan ndihmë nga policia dhe kërkuan ardhje të autoambulancave. Për hir të së vërtetës, thuajse të gjithë të plagosurit, të gjithë të gjakosur me plagë të ndryshme në fytyrë, kokë dhe pjesë të ndryshme të trupit, u dërguan me makina të rastit në spitalin e Elbasanit.

Policia dërgoi një patrullë të përforcuar dhe ata ndihmuan në transportimin e të plagosurve. Më vonë mbërritën dhe dy makina autoambulancë të cilat tërhoqën edhe disa persona të lënduar. Po ashtu një helikopter u vu në gatishmëri për ngjarjen. e.t/i.t/t.d/noa.al

Deklarata zyrtare nga Policia

Rreth orës 16.50’ të ditës së sotme është marrë informacioni se në aksin rrugor Tiranë- Elbasan, rreth 3 km pa hyrë në qytetin Elbasan, në vendin e quajtur Qershitë, autobusi me targë Lb 3156 A, drejtuar nga shtetasi Mit’hat Biçaku, ka dalë nga rruga dhe ka rënë rreth 10 metër poshtë.

Menjëherë, drejt vendngjarjes janë nisur forca të Drejtorisë së Policisë së Qarkut Elbasan dhe të Njësisë Rajonale të Policisë Rrugore Elbasan për të dhënë ndihmën e nevojshme dhe për të menaxhuar situatën.

Nga aksidenti kanë mbetur të plagosur 8 nga pasagjerët e këtij autobusi. Të dëmtuarit në këtë aksident janë transportuar drejt ambienteve spitalore dhe aktualisht janë jashtë rrezikut për jetën, vetëm dy prej tyre kanë pësuar dëmtime më të rënda, por pa rrezik për jetën.

Nga strukturat e Policisë së Shtetit të pranishme në vendngjarje aktualisht po punohet për zbardhjen e shkaqeve të këtij aksidenti.