Tirana kënaqet me Kupën

Pas dështimit përfundimtar në evenimentin më të rëndësishëm të futbollit që është Kampionati, bardheblutë arrijnë të fitojnë me vështirësi dhe shumë polemika një kupë të kontestuar dhe të braktisur nga skuadrat e mëdha

TIRANË – Elbasani u mund në mënyrë të dyshimtë në fushën e vet, me humbjen 0-3 ndaj Tiranës (1/2 finale e kupës), duke shkaktuar zemërimin e tifozëve vendas, disa prej të cilëve edhe u përleshën me policinë. Sipas informacioneve të djeshme, dy tifozë të paktën u shoqëruan për në komisariat pasi një grup “portokallinjsh” shfreu inatin për humbjen e kontestuar të skuadrës së tyre në takimin e parë gjysmëfinal.

Në stadiumin “Ruzhdi Bizhuta” ishin një numër i konsiderueshëm tifozësh si dhe disa dhjetëra nga Tirana. Prania e Presidentit të Republikës Bamir Topi bëri që stadiumi të “blindohej” nga prania e dendur e policisë që nuk toleroi aspak. Pas takimit, blutë kontrolluan zemërimin e tifozëve vendas që u përpoqën të bllokonin rrugën para stadiumit si dhe shoqëruan autobusin e Tiranës dhe mjetet e tifozëve kryeqytetas deri në nisje të Kërrabës.

Daniel Xhafaj dhe Klodian Duro (2) ishin “ekzekutorët” në një 90 minutësh ku bardheblutë u shfaqën disi më mirë se skuadra e Krenar Alimehmetit. Tifozët prisnin krejt tjetër gjë pas humbjes së çuditshme 1-2 në kryeqytet pak ditë më parë, kur Tirana fitoi me 9 lojtarë në fushë. Të gjithë ishin të bindur për fitore, madje deklarohej edhe fjala hakmarrje, por ndodhi e kundërta.

Për herë të parë këtë sezon, Tirana e Memës u shfaq vërtet bindëse, ndonese behej fjale per nje kompeticion te dores se dyte siç eshte Kupa e Republikes. Ajo u ndihmua nga lojtarët e saj kryesorë si elbasanasi Duro dhe Hyka, por edhe Deliallisi, Fagu apo lojtarët e mbrojtjes. Pjesa e parë ishte më e mirë për Tiranën që numbi disa raste me Fortuzin e Xhafajn, ndërsa Duro gjuajti rrezikshëm nga jashtë zone.

Në pjesën e dytë loja u ekuilibrua, por sërish Tirana ishte më afër golit i cili erdhi për meritë të Duros. Lojtari i kombëtares iu shmang 2-3 futbollistëve elbasanas dhe dhuroi një top të përsosur për Xhafajn që e dërgoi në rrjetë, i gjendur përballë portierit vendas. Më pas Tirana tregoi dëshirë për të vazhduar goleadën dhe Duro shënoi me penallti. Vetë Duro humbi një rast tepër të pastër kur mund të pasonte tek Xhafaj, ndërsa në minutat e fundit, Duros iu dha asist nga e majta duke e ndihmuar të shënonte gol para portës së boshatisur. Elbasani e mbylli ndeshjen me 10 futbollistë sepse kapiteni Ahmataj u përjashtua me të kuqe në 86’.