Ke lindur ne vjeshte?Mund te jetosh 100 vjec!

Të kesh lindur në vjeshtë, mund të jesh më i favorizuar për të jetuar deri në njëqind vjet. Lajmi i mirë për ata që i kanë ditëlindjet e tyre mes shtatorit dhe nëntorit, vjen nga një ekip i shkencëtarëve amerikanë, Leonid Gavrilov dhe Natalia Gavrilova, nga Universiteti i Çikagos, të cilët e kanë publikuar studimin e tyre në revistën shkencore "Journal of Aging Research". Sipas tyre, duket se fëmijët e lindur në muajt e parë të afrimit të dimrit, kanë më shumë gjasa të bëhen “100 vjeçarë”, në krahasim me ata që kanë lindur në të gjitha periudhat e tjera të vitit. Një përzierje e faktorëve sezonalë, cilësohet argumenti i tyre kryesor, lidhur me një dukuri të tillë. Për të vijuar më tej, se muaji i lindjes mund të ndikojë pikërisht në mjedisin në të cilin fëmija po zhvillohet brenda barkut të nënës. Provat shkencore sugjerojnë se kjo mund të ketë pasoja mbi sjelljen dhe gjenetikën e bebes dhe kanë një ndikim në shëndetin e saj gjatë jetës. "Hipoteza më e kuotuar për të shpjeguar rezultatin e hulumtimit është se infeksionet e fituara në muajt e parë të jetës, krijojnë një dëm afatgjatë mbi shëndetin e njeriut", thotë Gavrilov. (noa)