Kur bukuria eshte thike me dy presa!

Ndodh që afërsia dhe tërheqja, pas fazës së parë të dashurisë, të mos ekzistojnë më për arsye se edhe faktori estetik është konsumuar. Këshillat për të shmangur rreziqet dhe për të shpëtuar lidhjen tuaj “I dashuri im është vërtet një djalë i pashëm, ka trup të bukur, por nuk më tërheq më”; “Jam me vajzën më të bukur që kam njohur ndonjëherë, të gjithë më kanë zili, por mua më pëlqen dikush tjetër që nuk është dhe aq e pashme”; “Nuk e kuptoj, jam me personin e duhur, është tipi që kam dëshiruar gjithmonë, por ka diçka që nuk shkon”. Janë tre fjali që tregojnë një realitet paradoksal, por shumë të përhapur: shumë prej nesh e shohin partnerin/en e tyre si të duhurin nga pamja e jashtme, por jo të duhurin nga ana erotike. Ka nga ata që flasin për tërheqje të pakët, ose aspak, të tjerë për marrëdhënie vëllazërore. Megjithatë, për personin që na ka magjepsur, jemi bërë xhelozë, madje mund të kemi sjellë në jetë edhe fëmijë. Po tani pse nuk na ngjall më pasion? Arsyet mund të jenë nga më të ndryshmet: stresi i përditshmërisë, humbja e misterit, koha e pakët që i kushtohet çiftit, akumulimi i inatit dhe mërive. Por në thelb, nëse mes partnerëve ka tërheqje seksuale, zakonisht këto pengesa nuk mjaftojnë për të fikur dashurinë. Atëherë çfarë ka ndodhur?

Tipi i duhur që rezulton i gabuar…

Në shumë raste, krisja ndodh që në fillim të marrëdhënies dhe jeton në një realitet që është i vështirë jo vetëm për t’ia pranuar vetes, por edhe për t’ia pohuar tjetrit. Kështu, as erosi, i kuptuar si ngjashmëri seksuale dhe pasion i madh, nuk ka ekzistuar që nga fillimi. Të pranishme mund të kenë qenë vetëm eksitimi i fillimit dhe kënaqësia që po bën dashuri me një person të cilin e pëlqen, sepse mendon që është “tipi i duhur” dhe kërkon të zbulosh të rejat e tij/saj. Pastaj ka mjaftuar pak kohë dhe rutina që gjithçka të venitet. Tani gjendeni me një partner që e doni shumë, me të cilin keni ngjashmëri njerëzore, kulturore dhe që ndani gjithçka, por nuk keni tërheqje fizike. Gjithsesi në shumë raste, situata është reciproke, sepse në thelb problemi është i njëjti, thjesht ndryshon mënyra që keni zgjedhur.

Gabimi fillestar

Në fillim të një historie mund të bëjmë një gabim të madh: duke u bazuar te mirëbesimi dhe synimet e mira bëhet një zgjedhje – pa hequr dorë nga ndjenjat – e tipit estetik. Dhe kjo jo vetëm në kuptimin e parë të fjalës (pra jemi të prirur të shkojmë drejt një personi me karakteristikat e fytyrës që janë brenda standardeve të bukurisë që dominon sot), por edhe në një kuptim më të gjerë: i jepet shumë rëndësi aspektit formal, karakteristikave “ideale” të partnerit. Kështu, shumë persona, mund të kërkojnë partner/e që është e paraqitshme për prindërit dhe miqtë; nëse ka para dhe është në karrierë; nëse bashkë bëni një çift të bukur në sytë e të tjerëve, nëse ajo mund të jetë një nënë e mirë dhe ai një baba për shtëpi, e kështu me radhë. Natyrisht që edhe këto janë vlerësime të cilat duhen marrë për bazë, gjithmonë në qoftë se doni një histori pasioni, por më të rëndësishme janë ato të planit erotik dhe afimiteti fiziko-seksual (për shembull që aroma e lëkurës së partnerit ju pëlqen ose jo). Nëse dikur martesat vendoseshin nga familjet, sot në shumë raste ndikohen nga modelet mendore të referencës, si familjare ashtu edhe sociale. Kjo mund të duket e pabesueshme, duke marrë parasysh përparimet në ndërgjegjen e sotme, por ndodh shpesh që një burrë ta lërë partneren (edhe pse mund t’i pëlqejë në seks) vetëm se ka celulit, të ndenjura të mëdha, ose gjoks të vogël. Por ka edhe femra që e zgjedhin partnerin vetëm se ka trup me muskuj, është i gjatë, ka sy blu, ose ka një pozicion shoqëror shumë të mirë.

Fantazi prej vërteti

Ajo që të habit veçanërisht sot, duke pasur parasysh lirinë e madhe morale që kemi sot, është mungesa totale e njohurive që shumë prej nesh kanë për seksualitetin e vet dhe shijet e tyre të vërteta. Janë të shumtë ata që nuk e kuptojnë rëndësinë e vërtetë të formave trupore, të cilat nxisin pasionin (ose aromën misterioze të personit), por u kushtojnë rëndësi formave “të bukura në abstraksion”, si ato fizikisht, ashtu edhe në aspektin e njohjes sociale. Konfirmimi se sa e rëndësishme është kjo karakteristikë për jetën e çiftit, është fakti se shpesh fantazitë erotike të personave që kanë bërë zgjedhje të tilla, zakonisht janë të populluara nga “partnerë” me karakteristika fizike dhe sjellje që ndryshojnë nga ato të partnerit/es së vërtetë. Kjo krijon një ndarje të vërtetë mes botës së brendshme (çifti) dhe asaj të jashtme (epshet dhe instinktet), me këtë të fundit që kërkon medoemos, e nganjëherë me dëshpërim, një fytyrë, një trup, një person – të vërtetë ose imagjinar – ku të gjejë ngrohtësi dhe të ndihet i mbushur. Kjo është baza e krizës së shumë çifteve, por të qenit i ndërgjegjshëm mund t’ju ndihmojë të bëni zgjedhje të vështira, edhe pse në mes, mund të jetë zemra.

Kërkoni partnerin e duhur? Gabimet që nuk duhen bërë

- Bëni shumë kujdes me pamjen e jashtme (“Është i bukur”).

- Dëshirën për një zgjedhje të qetë (“Është punëtor i madh, njeri i mirë dhe prind i përkushtuar”).

- Gjendjen ekonomike (“Është shumë i pasur”).

- Nevojën për konfirmime personale (“Thotë se më do dhe do të më dojë sa të jetë jeta”).

- Nevoja për shpengim ose hakmarrje (“Me të formoj një çift për t’u pasur zili”).

Udhëzimi: Ndryshoni shikimin

Nëse historitë tuaja përfundojnë gjithmonë për të njëjtat arsye, pra për mungesë erosi, ndoshta zgjedhjet tuaja janë të ndikuara nga kriteret e gabuara. Kur takoni dikë, përpiquni më tepër të orientoheni te tërheqja seksuale dhe te diçka irracionale, sesa tek ajo që është e “drejtë” dhe në rregull për ju.

Bëhuni më të ndërgjegjshëm

Nëse shihni që marrëdhënia juaj është shuar, rishikojeni dhe një herë mendërisht historinë tuaj të dashurisë. Ka pasur ndonjë fazë pasioni të fortë? Si ishte dashuria në fillim? Prej sa kohësh erosi është zhdukur nga jeta juaj? Ndonjëherë jemi të prirur të mohojmë realitetin, të mos e shohim në fytyrë, por ndonjëherë është shumë e rëndësishme të jemi të ndërgjegjshëm për situatën.

Ndonjëherë pasioni shuhet edhe mes partnerëve, por ata vazhdojnë bashkë për inerci. Megjithatë “zgjedhja estetike” nuk e përjashton faktin e ndezjes së pasionit. Kështu për të shpëtuar lidhjen, përpiquni të rizbuloni gjërat që ju kanë mbetur nga partneri/a. Mund ta nisni nga veshjet, parfumi, grimi, etj. Kjo mund të nxisë një ndjenjë misteri.

Puthja, rikthen pasionin

Jeni të stresuar? Një puthje e ëmbël mund t’ju rikthejë humorin dhe t’ju zgjojë nga gjumi i rëndë, në të cilin keni rënë. Puthja mund të shmangë zënkat, zemërimet e nxitura nga faktorët e jashtëm: lodhja, puna, shpërqendrimi, mungesa e vëmendjes së partnerit, etj. Po ashtu, puthja forcon sistemin imunitar, pra funksionin si një vaksinë natyrore. Duke u puthur në buzë ngjiten mikrobe që e ndihmojnë trupin të zhvillojë mbrojtjet imunitare. Ndoshta nga ana shkencore nuk është edhe aq higjienike, por vlen më shumë se një zënkë, kështu që ia vlen të tentosh. Kush puth e mban edhe trupin në formë, sepse jo vetëm që djeg shumë kalori, por vë në lëvizje edhe muskujt e fytyrës, që duke u aktivizuar ndihmojnë në parandalimin e rrudhave dhe të kesh një pamje më të re.

Një puthje e ëmbël mund t’ju rikthejë humorin dhe t’ju zgjojë nga gjumi i rëndë, në të cilin keni rënë

Në fillim të një historie mund të bëjmë një gabim të madh: duke u bazuar te mirëbesimi dhe synimet e mira bëhet një zgjedhje – pa hequr dorë nga ndjenjat – e tipit estetik

Ndodh shpesh që një burrë ta lërë partneren (edhe pse mund t’i pëlqejë në seks) vetëm se ka celulit, të ndenjura të mëdha, ose gjoks të vogël. Por ka edhe femra që e zgjedhin partnerin vetëm se ka trup me muskuj, është i gjatë, ka sy blu, ose ka një pozicion shoqëror shumë të mirë

Nëse shihni që marrëdhënia juaj është shuar, rishikojeni dhe një herë mendërisht historinë tuaj të dashurisë. Ka pasur ndonjë fazë pasioni të fortë? Si ishte dashuria në fillim? Prej sa kohësh erosi është zhdukur nga jeta juaj?

Shumë prej nesh e shohin partnerin/en e tyre si të duhurin nga pamja e jashtme, por jo të duhurin nga ana erotike. Ka nga ata që flasin për tërheqje të pakët, ose aspak, të tjerë për marrëdhënie vëllazërore. (gazeta-shqip)