Aurela, Soni, Tuna dhe Bojkeni, 4 emrat e përfolur për jurinë e “X Factor”

Spektakli “X factor” këtë vit do të nisë transmetimin në ekranin e “Tv Klan” në vjeshtë, ndryshe nga sezoni i kaluar. Përveç Alketa Vejsiut, e cila moderon këtë show me regji të Vera Grabockës, kanë nisur diskutimet për emrat e anëtarëve të jurisë, apo mentorëve, siç jemi mësuar t’i quajmë në këtë show. Edhe pse ende nuk është vendosur për largimin përfundimtar ose jo të Pandi Laços, Alban Skënderaj, Juliana Pashës dhe Vesa Lumës, tashmë kanë filluar të qarkullojnë emrat e artistëve, që do mund t’i zëvendësojnë. Aurela Gaçe, Soni Malaj, Tuna Sejdiu dhe Bojken Lako, janë emrat e diskutuar mes producentëve të “X factor”, për të cilët pritet të vendoset përfundimisht këto ditë. Gjatë spektaklit të kaluar u bënë të njohur në këtë garë emra dhe grupe, si: Grupi X, Festina Mejzini, Kristo Thana, Gerald Zyfi etj. Fituesja e “X factor Albania”, Sheila Haxhiraj, bashkë me çmimin, fitoi të drejtën të realizojë një CD me gjithë interpretimet në “X Factor”, e cila do të shpërndahej nga “Sony Music”. /LajmetVip/