Ja “Venus”, jahti i ideuar nga babai i “Apple”, Steve Jobs (video)

Nëse sot Steve Jobs do të ishte ende gjallë, me siguri do të ishte ende duke projektuar risi të reja, edhe përtej kompanisë “Apple”. Një krijesë e tij është edhe jahti i gjatë 70-80 metra, që është pagëzuar me emrin “Venus”. Përurimi i këtij mjeti është bërë në Aalsmeer, qytezë e vogël holandeze me rreth 30 mijë banorë. Barka i përgjigjet dizajnit të jashtëzakonshëm minimal që ka bërë të famshme produktet “Apple” dhe është e pasuruar nga brenda prej dizenjimeve të Philippe Starck. Jobs ka punuar për "Venus" që kur i lindi si ide, gjë që tregohet edhe në biografinë e tij të shkruar nga Walter Isaacson.

Projekti i këtij jahti elegant dhe "minimal" ishte praktikisht si ai i një dyqani “Apple”. Dritaret e kabinave janë me dimensione të mëdha, nga dyshemeja deri në tavan, ndërsa dhoma kryesore është projektuar që të kishte xhama të lartë rreth 12 metër dhe të gjerë të paktën 3 metra. Për këtë, Jobs i kishte kërkuar ndihmë kryeinxhinierit të dyqaneve “Apple” për të projektuar një xham special që të ishte në gjendje t’i jepte një mbështetje strukturore. Jahti është i pajisur edhe me disa “iMac” prej 27 polesh në sallën e kontrollit, duke përfaqësuar kështu instrumentin kryesor në dispozicion të ekuipazhit për të monitoruar me kujdes çdo aspekt. Faktikisht, Steve e kishte projektuar për të shëtitur botën me të shtrenjtët e tij: gruan Laurene dhe fëmijët Eve, Erin dhe Reed, të cilëve u ka kaluar tashmë në zotërim.

“Venus” ka marrë formë si përfundim në kantieret detarë holandezë të “Feadship”. Të gjithë ata që kontribuuan për realizimin e këtij mjeti detar kanë marrë një dhuratë simbolike nga familja Jobs: një “iPod Shuffle” me emrin e vet të shkruar në pjesën e prapme dhe një letër me disa radhë domethënëse falënderimi.