Revolucioni i femrave: Azarenka më e pasur se Federer!

Tenistja bjelloruse ka fituar këtë vit 7 milionë dollarë në turnetë sezonale. Për herë të parë, 15 teniste femra kanë fituar mbi 1 milionë

Tenistja bjelloruse Viktoria Azarenka mund të quhet me plot gojë pasanike në sportin e tenisit. Këtë e konfirmojnë shifrat, jo vetëm ato në fushë, por edhe ato të çmimeve financiare që ajo ka fituar në turnetë e ndryshëm WTA.

Numri 1 në botë për femra, Azarenka, e cila këtë vit ka fituar grand alemin e Australia Open, duke i hapur rrugën një pasurie vërtet për t’u patur zili. Ajo ka fituar rreth 7 milionë dollarë (më saktë, 6.953.920, afërsisht 5 milionë e 300 mijë euro) këtë vit, duke kaluar edhe tenistin zviceran Roxher Federer (numri 1 në botë për meshkuj), që deri më tani ka fituar 6.5 milionë dollarë në turnetë ATP.

Por nuk është vetëm kjo shifër publikuar dje nga Federata Botërore që mahnit të gjithë, por edhe fakti që në vitin 2012, janë 15 teniste që kanë fituar mbi 1 milionë dollarë nga fitoret apo pjesëmarrjet ën turnetë e ndryshëm. Ky është një rekord absolut, duke përmirësuar shifrën e 11 tenisteve me mbi 1 milionë dollarë të vitit 2008. jo vetëm kaq, por 3 teniste: Azarenka, Sharapova dhe Serena Uilliams, kanë fituar mbi 5 milionë dollarë, një shifër rekord, që nuk i ka lënë indiferentë kolegët e tyre.

Studimi që kanë kryer disa ekspertë të Federatës Botërore të Tenisit ka evidentuar si shumë të rëndësishëm faktin se tenistet më të mira kanë filluar gjithnjë e më shumë të marrin pjesë në turnetë e rëndësishëm Masters, që japin edhe më shumë para. Kjo pjesëmarrje ka një rritje prej 34% nga viti 2008 në vitin 2012, ndërkohë që çmimet për tenistët janë rritur me 51%. Kjo ka ndodhur pasi me kërkesë të vetë tenisteve, kalendari i femrave ka ndryshuar, duke e bërë sezonin më të shkurtër dhe të përballueshëm, sidomos për lojtaret më të mira, që kishin kërkesa nga organizatorët e turneve në mbarë botën.

Kalendari i ri është më i shkurtër dhe më i racionalizuar, numri i turneve është pakësuar, por njëkohësisht janë rritur çmimet, koha për të rikuperuar nga një turne në tjetrin është më e madhe. Në këtë mënyrë, WTA ka arritur të mbledhë 160 milionë dollarë më shumë nga sponsorizimet, të drejtat televizive.

Nëse te femrat situata është e kënaqshme nuk mund të thuhet e njëjta gjë për meshkujt, që edhe javën e kaluar kanë kërkuar nga Federata Botërore dhe organizatorët më shumë parà nga turnetë ku ata marrin pjesë. Federer, Gjokoviç dhe Murrai por edhe mjaft emra të tjerë të tenisit botëror kanë kërkuar më shumë të ardhura, çka detyroi organizatorët e Australia Open të rrisin me 15% çmimet për tenistët pjesëmarrës.

Grand slemi australian që nis në janar të 2013-s është më i pasuri i të gjitha kohërave, me rreth 24 milionë euro, duke evituar kështu një bojkot të tenistëve. Por kërcënimi i tyre është ende i pranishëm dhe organizatorët e turneve Masters të vitit të ardhshëm duhet të mendohen shumë për të mos patur probleme me bojkotin e tenistëve të mëdhenj, që sjellin edhe më shumë sponsorë.



Nadal konfirmon mungesën në Paris e Londër

Tenisti spanjoll Rafael Nadal ka konfirmuar sërish dje se nuk do të marrë pjesë në turneun e fundit Masters që zhvillohet në Paris javën e ardhshme, ashtu sikurse do të mungojë edhe në finalet e këtij sezoni. Më 5 nëntor, në Londër, zhvillohet turneu i më të mirëve për meshkuj, ku marrin pjesë 8 vendet e para.

Nadal (aktualisht i katërti) do të mungojë dhe vendin e tij do ta zërë tenisti që renditet i nënti. “Më vjen keq që do të mungojë në turnetë e fundit sezonalë, por besoj se kjo nuk është një surprizë për të gjithë. Besoj se shumë shpejt do të nis stërvitjen, duke parë se progresi që kam patur pas dëmtimit në gju është i ndjeshëm.

Megjithatë, kjo nuk më jep mundësi të paraqitem në këto dy turne, pasi nuk mund të jem në formën më të mirë. Ndaj preferoj që të vazhdoj të stërvitem në Majorka, të punoj fort, për t’u rikthyer sa më shpejt në fushë”, – tha Nadal. Kjo do të thotë që ai do të mungojë edhe në finalet e Kupës Davis, që zhvillohen më datat 16-18 nëntor e ku Spanja do të luajë ndaj Republikës Çeke. Në dyshim është edhe prania e tij në turneu e Abu Dhabit, që zhvillohet në Dubai në fund të dhjetorit, megjithëse organizatorët kanë deklaruar se spanjolli do të jetë pjesëmarrës. /SportiShqiptar/