Lamturmire “MSN”, Microsoft do e bashkojë me Skype!

Mësohet se gjatë muajve të ardhshëm do të tërhiqet përfundimisht nga qarkullimi "Windows live Messenger"

Pas më shumë se një dekade, mesazhit të përcjellë përmes "Windows live Messenger" duhet t'i zihet vendi nga Skype. Nga burime pranë Microsoft mësohet se gjatë muajve të ardhshëm do të tërhiqet përfundimisht nga qarkullimi "MSN"-ja e famshme, ndonëse teknologjia që qëndron prapa saj do të vazhdojë. Praktikisht do të njësohet me "software"-in e Skype, duke i dhënë mundësinë përdoruesve të "logohen" si zakonisht, të shohin kontaktet e tyre, por tashmë nga aplikacioni i Skype. Zyrtarizimi i bashkimit të këtyre dy shërbimeve mund të vijë shumë shpejt para fundit të këtij viti, madje ka zëra që thonë edhe brenda kësaj fundjave.

E lindur në vitin 1999, MSN Messenger (i rinominuar në 2005-n si "Live Messenger", ka qenë një nga sukseset më të mëdha të Microsoft, me më shumë se 300 milionë përdorues aktivë në muaj. Përgjatë viteve janë lëshuar disa versione, deri te më i fundit "16.4" i disponueshëm që prej fillimit të tetorit për të gjitha platformat. Pas 13 vjetësh aktivitet, gjatë të cilëve është përdorur shpesh si vektor edhe për shpërndarjen e viruseve, “Windows Live Messenger” pritet të braktiset. Do të zhduket aplikacioni, por platforma do të mbetet. /ikub/