Forbes, Shqipëria e 74-ta për të hapur biznes, lëmë pas Serbinë!

Shqipëria është renditur në vendin e 74 në listën e 141 vendeve, të cilat janë të përshtatshme për të ngritur një biznes. Kjo sipas revistës së famshme amerikane Forbes. Në krahasim me vendet e rajonit, në renditje bie në sy që, Shqipëria është e parafundit, duke lënë pas vetëm Serbinë. Ndërsa përpara kemi Greqinë - pavarësisht se ajo ka 5 vite në recesion gjendet në vendin e 68 - Rumaninë në vendin e 60 e më pas vijnë Bullgari, Kroaci, Hungari, ndërsa në vendin e 37 është Maqedonia. Në analizën e Forbes argumentohet se qeveria në Shqipëri ka bërë një punë të madhe dhe të vështirë në kalimin nga një ekonomi e centralizuar në një ekonomi të hapur.

Rritja makroekonomike llogaritet mesatarisht rreth 6% në vitet 2004-08, por dhe rreth 3% në 2009-2011. Inflacioni është i ulët dhe i qëndrueshëm. Sipas Forbes, qeveria ka marrë masa për të frenuar krimin dhe kohët e fundit miratoi një paketë reformash fiskale, që synojnë uljen e ekonomisë gri dhe tërheqjen e madhe të investimeve të huaja. Remitancat, të cilat janë cilësuar si një një katalizator i rëndësishëm për rritjen ekonomike, kanë rënë nga 15% të GDP-së para krizës financiare në 2008 në 8% të GDP-së në vitin 2010. Sektori i bujqësisë, i cili është përgjegjës për pothuajse gjysmën e vendeve të punës, është i kufizuar, kryesisht në ferma të vogla familjare për shkak të mungesës së pajisjeve moderne, paqartësitë tek të drejtat e pronësisë etj.

Forbes thotë se qeveria ka nisur një program ambicioz për të përmirësuar klimën e biznesit nëpërmjet reformave fiskale dhe legjislative. Por megjithatë, mungesa e energjisë për shkak të rrjetit të amortizuar ka bërë që të largohen investitorët e huaj. Gjithashtu, me ndihmën e fondeve të BE-së, qeveria po ndërmerr hapa për të përmirësuar rrugët e dobëta kombëtare dhe rrjetin hekurudhor, që janë bërë për një kohë të gjatë pengesë për rritjen e qëndrueshme ekonomike. Nuk është lënë pa përmendur niveli i lartë i borxhit. Sipas Forbes, vendi do të vazhdojë të përballet me sfida nga rritja e borxhit publik, i cili është në kufirin e tij, 60% të GDP-së.

/Shekulli Online/Përgatiti: M.A./