Sot ceremonia e rivarrimit të Mbretit Zog!

Mbreti Zog, i cili ndërroi jetë në vitin 1961 në moshën 65-vjeçare në Francë, do të rivarroset në atdhe pas një vendimi të qeverisë në kuadër të përvjetorit të njëqindtë të Pavarësisë.

Me mbërritjen e eshtrave në atdhe i është hapur drita jeshile ceremonive përkatëse që do të mbahen për rastin në fjalë e që do të kulmojnë sot me ceremoninë e përkujtimore në Pallatin Mbretëror për të mbërritur tek rivarrosja në mauzoleumin e familjes mbretërore.

Eshtrat e mbretit zog u pritën në një ceremony zyrtare shtetërore një ditë më parë në aeroportin ndërkombëtar Nënë Tereza në praninë e familjes mbretërore dhe ministrit të brendshëm Flamur Noka, ministrit të mbrojtjes Arben Imami, ministrit të Turizmit kulturës rinisë dhe sporteve Aldo Bumci dhe kryetarit të Partisë Lëvizja e legalitetit Ekrem Spahija.

Sot në orën 9.00 Makina funebre merr eshtrat nga banesa e Familjes Mbretërore
dhe i transporton drejt Pallatit Mbretëror, ku do të bëhen homazhet me pjesëmarrjen e autoriteteve më të lartë të shtetit shqiptar dhe personaliteteve në vend.

Homazhet do të zgjasin dy orë pas së cilës rreth orës 12.30 do të bëhet inaugurimi I mauzoleumit të familjes mbretëror.

Në këtë ceremoni do të flasë presidenti i republikës Bujar Nishani dhe një nga pjesëtarët e Familjes Mbretërore.

Ceremonia e vendosjes së eshtrave në banesën e fundit do të shoqërohet me të shtëna nga pushkatarët e Ministrisë së Mbrojtjes.

Në orën 19.00 deri në orën 20.30 Presidenti i Republikës do të shtrojë një darkë për pjesëmarrësit dhe familjarët në Pallatin e Brigadave duke i bërë të gjitha nderimet një figure të shquar të historisë në këtë 100 vjetor të shtetit shqiptar, mbretit Ahmet Zog i Parë. /BS/