Argjentina ka menduar të bëjë këngë pa asnjë cent!

Këngëtarja Argjentina Ramosaj kishte njoftuar se kënga e radhës, që ajo do të sjellë, do të jetë një duet me këngëtarin e njohur Vedat Ademi. Këtë lajm ajo e kishte bërë të ditur përmes rrjetit social facebook. “Në studio duke realizuar duetin me mikun tim dhe këngëtarin Vedat Ademi”, ka shkruar Argjentina para pak kohësh, ndërkohë që për këtë bashkëpunim këngëtarja Ramosaj kishte muaj që kishte njoftuar fansat e saj. Por, si duket, një duet i tillë nuk do të mund të realizohet për shkak të disa mosmarrëveshjeve që kanë hasur këngëtarët mes tyre. Duket se shkak për prishjen e bashkëpunimit ka qenë ngurrimi i Argjentinës për të paguar gjysmën e këngës, duke e arsyetuar se ajo është e ftuar vetëm si mysafire në këngë dhe nuk do të paguajë asnjë cent për këngën. Për këtë arsye thuhet se Vedati e ka ndërprerë bashkëpunimin dhe ky duet ka dështuar.

Nuk dihet nëse Vedati ka vendosur ta zëvendësojë Argjentinën me ndonjë këngëtare tjetër, por dihet me siguri se Vedati shumë shpejt do të udhëtojë drejt Shteteve të Bashkuara të Amerikës, si dhe pritet të bëhet baba i një djali për herë të parë. Ndërsa Argjentina po e shijon akoma lidhjen me parukierin Armend Gashi, lidhje kjo e zbuluar për herë të parë në suplementin “Panorama plus”.