Mbrëmje gala për 100 shqiptarë të suksesshëm!

Janë 100 histori suksesi në 100-vjetor. Në këtë vit të shënuar, konceptuar si një festë qysh në hyrje të tij, nuk mund të mungojnë edhe ata shqiptarë që, ndonëse nuk janë në Shqipëri, e festojnë gjithsesi një shekull pavarësi. Janë të gjithë ata shqiptarë, që kanë arritur të jenë të suksesshëm në profesionet e tyre, kudo që kanë shkuar në botë. Dikush në skenën lirike, një tjetër në artet pamore, dikush në mjekësi… Të gjithë ata do të bëhen bashkë në një mbrëmje gala, që do të kurorëzojë projektin “Albanian Excellence”. Një nismë që ka nisur qysh një vit më parë, për të treguar se shqiptarët mund t’ia dalin, kudo që të jenë, madje të jenë edhe të suksesshëm. Mbrëmja e 23 nëntorit në Teatrin Kombëtar të Operës dhe Baletit do të jetë e gjitha e tyrja. Ishte gazetarja Flora Nikolla, që ideoi së pari projektin “Albanian Excellence”, duke gjetur më tej mbështetjen e një grupi bashkëpunëtorësh, që u vunë në kërkim të personazheve, historive të tyre. Sipas Nikollës, brenda pak muajsh u mblodhën më shumë se 200 histori suksesi të shqiptarëve nga Kosova, Maqedonia e Mali i Zi.

“Ideja finale e këtij projekti është krijimi vit pas viti i një database të shqiptarëve të suksesshëm në botë”, thotë Flora Nikolla, duke shtuar se pavarësisht se janë zgjedhur 100 histori suksesi që janë botuar në një libër, tashmë database i krijimit të vlerave të shqiptarëve është shumë më i madh. Kjo është arsyeja pse çdo vit, në prag të çdo përvjetori të festimit të Pavarësisë, do të botohet një libër që përmbledh historitë e shqiptarëve të suksesshëm, sikundër do të organizohet edhe një mbrëmje gala, ku do të shpallen tri historitë më të spikatura të të përzgjedhurve të atij viti. Libri i parë “Albanian Excellence 2012 – 100 histori suksesi në 100-vjetorin e Pavarësisë” përmbledh emra të shqiptarëve që kanë arritur suksesin në Shtetet e Bashkuara të Amerikës, Itali, Francë, Gjermani, Francë, Suedi, Zvicër, Izrael, Norvegji, Çeki etj., përzgjedhur nga një bord, anëtarë të të cilit janë personalitete të fushave të ndryshme. Të përzgjidhje mes një liste të gjatë historish njerëzore, mes aq shumë emrave të nderuar, mesazheve që ato përcillnin, nuk ishte aspak e thjeshtë dhe u desh një periudhë e gjatë diskutimesh, deri në reduktimin e një liste prej 100 emrash. Realizimi i një libri luksoz, me rreth 500 faqe, mbështetur nga “Raiffaisen Bank”, është konceptuar në formën e një dhurate për gjithë protagonistët e tij, pjesa më e madhe e të cilëve mësohet se kanë konfirmuar pjesëmarrjen e tyre në mbrëmjen gala, më 23 nëntor në TKOB.

Flora Nikolla me disa nga protagonistët e “Albanian Excellence”

Mbrëmja gala

Zakonisht librat i prezantohen publikut përmes promovimeve. Edhe “Albanian Excellence 2012 – 100 histori suksesi në 100-vjetorin e Pavarësisë” do ta ketë një syresh, por në formën e një galaje. Mbrëmja gala do të realizohet në Teatrin Kombëtar të Operës dhe Baletit, nën skenografinë e artistit të njohur shqiptar me banim në Nju Jork, Andis Gjoni, me regji televizive të Petri Bozos, skenar të Flora Nikollës. E gjithë mbrëmja është ngritur mbi dhe për protagonistët e librit, të cilët do të jenë edhe yjet e kësaj nate. Prezantimi i mbrëmjes do të jetë një surprizë më vete. Ajo i është besuar Marina Grabovarit, një nga protagonistet e skenës shqiptare në vitet ’80, e cila rishfaqet sërish pikërisht me këtë rast. Të ftuarit kanë filluar të vijnë një nga një. Rreth 50 prej tyre nuk janë menduar dy herë që të marrin avionin e të zbresin në Tiranë. Duke nisur nga regjia skenike e Albert Dedja dhe Dardana Bërdyna, artistë që kanë krijuar një teatër privat në Itali; shkrimtari i njohur shqiptar me banim në Rumani, Ardian Kyçyku, Vangjel Nina, violonçelist me banim në Greqi, Migen Begolli, violiniste me banim në Gjermani, Marsida Koni, pianiste e cila ka një shkollë private në Perugia në Itali, Besa Myftiu, shkrimtare me banim në Zvicër, aktori Kasem Hoxha me banim në Gjermani etj. Por edhe ata që nuk mundën të jenë fizikisht, nuk do të mungojnë. Ata do të jenë të pranishëm në këtë natë gala përmes intervistave dhe inserteve të realizuara nga organizatorët e këtij spektakli, në disa vende ku jetojnë shqiptarët e përzgjedhur nga “Albanian Excellence”. Ndër to do të jetë intervista me sopranon Orjana Kurteshi, realizuar në Paris, me pianisten Manjola Trebicka, piktorin Artur Muharemi, fotomodelen Alma Ajazi, tenorin Saimir Pirgu, artistin Kujtim Turkeshi, piktorin Armand Xhomo, intervista e realizuar në Tetovë me familjen Murtezani, Genc Tukiçin etj. Mbrëmjen gala do ta përshëndesë edhe Behgjet Pacolli, një nga protagonistët e librit, i cili do të vijë nga Kosova enkas për këtë mbrëmje dhe pritet të shpallet edhe President Nderi i qendrës “Albanian Excellence”.