Inva Mula: Kam zhveshur patriotizmin nga këngët e feminisë!

Sopranoja prezanton albumin me 12 këngë për atdheun: këngë të fëminisë, që këndoheshin në shtëpinë e Mulajve, këngë 100 e ca vjeçe, po edhe ato të krijuara me frymën e realizmit socialist.Sa i vështirë ka qenë seleksionimi i këtyre këngëve?Sigurisht që ka qenë. Ka shumë krijimtari, por seleksionimi në fakt është bërë për tematikën që trajtojnë. Te të gjitha këto këngë përmendet atdheu, Shqipëria. Kështu mund të duket një mori shumë patetike titujsh, por fundja fundit shkonte shumë mirë në këtë përvjetor. Kam dy vjet që e kam menduar që këtë periudhë ta kisha të lirë, vetëm për t’i kushtuar vëmendjen, kohën dhe energjinë time këtij evenimenti kaq të rëndësishëm. Zgjedhja ka qenë shumë e natyrshme. Duhej domosdoshmërisht të bëja diçka. Ka qenë një bashkëpunim shumë i mirë me Genc Tukiqin, dirigjentin e orkestrës Bujar Llapaj dhe fotografin Fadil Berisha. Kjo ka qenë një “buqetë këngësh” për atdheun, këngët më të bukura. Dhe duam që këtë trashëgimi t’ia lëmë brezit të ardhshëm. Prandaj mund të them se jam shumë e lumtur për këtë përzgjedhje sepse këta janë kompozitorë të pavdekshëm, janë pena të arta të literaturës së muzikës shqiptare. Çesk Zadeja me “O ju male”, Nikollaq Zoraqi me “Dhuratë për ditëlindje”, Fehim Ibrahimi me “Rrjedh në këngë dhe ligjërime” dhe “Unë biri yt Kosovë”, Pjetër Gaci “Për ty atdhe”, Avni Mula me “Shqipëri o vendi im”, “Moj e bukura Arbëri” dhe “Agimet shqiptare” etj., janë pena që meritojnë shumë më shumë se kaq. Shpresoj që në vitet e ardhshme të vazhdoj të kërkoj dhe të gjej nga krijimtaria shqiptare bulëza të tjera kaq të frymëzuara të cilat vazhdojnë të jenë pjesë e repertorit shqiptar. /Shekulli/