Parada e motoçiklistëve imiton udhëtimin me kuaj të para një shekulli !

Njëqind vite më parë Ismail Qemali as që mund ta çonte nëpër mend që një ditë të bukur do të shoqërohej në rrugën e tij të gjatë për mëvetësinë e Shqipërisë, jo më nga kuaj dhe kalorës të veshur me frak, por nga “kuaj” me emrin Harley Davidson dhe “kalorës” mjekërgjatë veshur me xhubokse meshini të zeza, hipur mbi to. Një gjë e tillë nuk është më fryt i fantazisë. Në kohën e motorizimit të shpejtë, gjithçka është e mundur. Pikërisht sot, vetë ai Ismail Qemal, në shekullin e tij të parë të pavarësisë, do të ketë luksin të shoqërohet në rrugën e tij jo më nga hingëllimat dhe troket e kuajve por nga zhurma e shurdhët e motorëve të cilindrave të lartë. Është e kuptueshme që për shkak të moshës së thyer do të jetë i pamundur ta ngasë vetë motorin për në Vlorë, por për këtë pjesë dhe për të mos i shtuar më shumë thinjat, të tjerë janë ata që kanë menduar t’ia lehtësojnë barrën e rrugës dhe të pleqërisë. Ata janë djemtë e Shoqatës së Motoçiklistëve të Kavajës. Po përse pikërisht ata? Sepse pikërisht 100 vite më parë, Ismail Qemali, në rrugën e tij për shpalljen e Shqipërisë së Pavarur, ndaloi edhe në Kavajë, ku edhe ngriti flamurin kombëtar. Fisnik Gjoni, kryetar i shoqatës së motoçiklistëve të këtij qyteti, zotohet se sot Ismail Qemalin, do ta dorëzojnë shëndoshë e mirë në duart e “Çetës së Labërisë”, ashtu si një shekull përpara, kur të parët e tyre e përcollën deri në dalje të qytetit për të vazhduar më tej rrugën drejt qëllimit madhor për shpalljen e Shqipërisë së pavarur. “Sot në orën 9.00, ne, motoçiklistët e qytetit të Kavajës, do të nisemi në fund të qytetit të Kavajës, për të shoqëruar pajtonin ku ndodhet sozia e Ismail Qemalit. Në fillim do të jemi 30 motoçiklistë.” Në hyrje të qytetit “kalorësve” nga Kavaja do t’u bashkohen edhe “kalorës” nga qytetet e tjera të Shqipërisë dhe viset e Kosovës. “Në orën 10.00, grupit tonë të motoristëve do t’u bashkohen edhe motoristë të ardhur nga qyteti i Durrësit, Tiranës si edhe nga Kosova. Në orën 11.00 pajtoni me Ismail Qemalin do të ndalet në qendër të qytetit të Kavajës. Aty do të na presë kryebashkiaku Elvis Roshi, ku së bashku do të ngremë flamurin kombëtar, ashtu si 100 vite më parë.” “Kuajt” që do të përdoren për marshimin historik variojnë 750-1500 kubikë. Do të jenë nga racat më të mira, nga Harley Davidson, Choper, Yamaha e me radhë. “Qëllimi i kësaj parade është nderimi i figurës së Ismail Qemalit. ai ka ndalur atëkohë në Kavajë, madje thonë që ka fjetur këtu dhe urdhëroi ngritjen e Flamurit Kombëtar”. Djemtë nga Kavaja nuk do e ndalin këtu udhëtimin. Menjëherë sapo të sigurohen që Ismail Qemali është në duart e sigurta të patriotëve të tij lebër që kanë dalë ta presin, do të nisen në mesnatën ose në mëngjesin e 28 nëntorit drejt Vlorës, që do të jetë edhe kryeqendra e festimeve për pavarësinë. Këtu bashkohen me “kalorësit” sivëllezër vlonjatë që do të dalin t’i presin. Akoma nuk është vendosur, por vetë kryebashkiaku i Kavajës, Elvis Roshi, thuhet se u ka kërkuar çunave që ta shoqërojnë me motorët e tyre më të mirë drejt Vlorës. “Kryetari i Bashkisë na ka kërkuar që të zgjedhim 5 motorët më të mirë dhe ta shoqërojmë më datë 28 nëntor drejt Vlorës. Dhe ne i kemi premtuar që do ta realizojmë një gjë të tillë. Në Vlorë ne do të bashkohemi edhe me motoristët e këtij qyteti si edhe me ata që do të vijnë nga rrethet e tjera.”

Kush janë?

Shoqata e Motoçiklistëve të Kavajës është më e vjetra në Shqipëri, 20-vjeçare. Kjo shoqatë numëron 25 anëtarë. Markat e motorëve që ata përdorin variojnë 750-1500 kubikë. Në Shqipëri si kjo shoqatë ka edhe simotra të tjera. Një prej tyre është edhe grupi “SteelWings” i cili aktivitetin e tij e ka të përqendruar në qytetin e Tiranës. Spektakli që motoristët e Kavajës do të dhurojnë sot në qytetin e tyre është ekzibicioni i parë ku ata kanë në qendër personazhin e Ismail Qemalit.

/Shekulli/