Nis festa në Vlorë, qeveria dhe PS të ndara!

Ashtu siç kemi shqiponjën e flamurit, me dy koka, ashtu po zhvillohen festimet e 100- vjetorit të Pavarësisë. Asnjë përfaqësues i qeverisë nuk mori pjesë në festimet e organizuara nga Bashkia e Vlorës dhe asnjë përfaqësues i Bashkisë dhe i opozitës nuk mori pjesë në festimet e bëra nga qeveria.

PS dhe Bashkia

Qyteti i Pavarësisë nderoi me titullin qytetar nderi akademikun Rexhep Qosje, shkrimtarin Ismail Kadare dhe ish-ambasadorin amerikan Xhon Withers. Qosja e cilësoi Vlorën si “qytetin që bashkon zemrat e të gjithë shqiptarëve”, ndërsa Withers deklaroi se në Vlorë ndjehet si në shtëpinë e tij. Në këtë ceremoni të organizuar nga Bashkia e Vlorës dhe Partia Socialiste, Edi Rama vlerësoi nismën e qytetarëve vlonjatë për të hapur dyert e shtëpive për të pritur qytetarët shqiptarë ngado që vijnë për të marrë pjesë në festën e Pavarësisë. “Faleminderit të gjithëve ju, faleminderit të gjitha atyre që i kanë dhënë sot Vlorës së Ismail Qemalit statusin e Kryeqytetit të Pavarësisë me ardhjen e tyre këtu dhe që e kanë konfirmuar këtë status, të cilin Vlorës askush dhe për asnjë arsye nuk mund t’ia heq dot. Faleminderit të gjithë qytetarëve vlonjatë që kanë hapur dyert, dyert e shtëpive të tyre për çdo shqiptar që dëshiron ta festojë pavarësinë”, tha Rama. Ra në sy mungesa e shkrimtarit Kadare, i cili ndoshta ka shmangur një takim me Qosjen, me të cilin kanë pasur debate publike. Më pas u zbulua shtatorja e Ismail Qemalit në qytetin e Vlorës.

Darka e qeverisë

Ndërkohë, në orët e pasdites nisën aktivitetet festive të organizuara nga qeveria me një koncert të madh në Sheshin e Flamurit ku i pranishëm ishte edhe kryeministri Sali Berisha. Kryeministri mbërriti në Vlorë, jo në 28, por në 27 nëntor, për 100-vjetorin e Pavarësisë. Edhe pse ai ka përgëzuar edhe opozitën, edhe të gjithë ata që do të shkojnë të festojnë në Vlorë, në fakt vetë e ka lënë Vlorën në vend të dytë.

Kryeministri Berisha drejtoi një dedikim të veçantë: “Mirëmbrëma Vlora! Mirëmbrëma mbarë Shqipëria e shqiptarët kudo ku jeni! Përshëndetjet më vëllazërore nga Vlora e flamurit, Vlora e Ismail Qemal Vlorës, Vlora e pavarësisë. Mirënjohjen më të thellë për këtë pritje vëllazërore. Do të lexoj këtu, para jush, këto pak fjalë që shkrova në këtë pergamenë: Vlorës, qytetarëve të saj, Ismail Qemal Vlorës e burrave të tjerë të kombit, që shpallën në këtë qytet të përjetshëm, në 28 nëntor të viti 1912, pavarësinë e Shqipërisë, pavarësinë e Shqipërisë etnike, Shqipërisë së të gjitha trojeve shqiptare nga Preveza në Preshevë, nga Shkupi në Podgoricë. Nder përjetë babait të pavarësisë së Shqipërisë Ismail Qemal Vlorës, burrave që firmosën aktin e pavarësisë, qytetarëve të Vlorës e të mbarë Shqipërisë! Gëzuar 100-Vjetorin!" Ky dedikim i Kryeministrit Berisha, i shkruar në pergamenë, do të vendoset e ruhet në Muzeun e Pavarësisë në Vlorë.

Në mbrëmje, në hollin e një hoteli të Vlorës, nën masa të larta sigurie u shtrua një darkë e ftuar nga kryetarja e Kuvendit, Jozefina Topalli. Merrnin pjesë deputetë, ambasadorë, vizitorë të huaj dhe qeveritarë nga Kosova, por mungoi opozita

Ndryshe nga Kryeministri Sali Berisha - i cili ka qenë dje në Vlorë, presidenti Nishani do të jetë në Vlorë sot më 28 Nëntor. Nishani do të festojë sot në orën 10.00 në Sheshin e Flamurit në Vlorë, e më pas do të bashkohet në festimet e mëdha në Tiranë, ku do të drejtojë edhe paradën ushtarake. /Shekulli/