100- vjet Shtet, Bota uron për Pavarësinë e Shqipërisë!

Personalitete të larta të botës, përmes Presidentit Bujar Nishani uruan dje mbarë shqiptarët për 100-vjetorin e Pavarësisë. Në mesazhin e saj, Sekretarja Amerikane e Shtetit, Hilari Klinton përforcoi apelin ndaj politikës shqiptare, për të miratuar reformat dhe për të mbajtur zgjedhje të lira vitin e ardhshëm. Thirrja e zonjës Klinton vjen vetëm pak kohë pas vizitës së saj në Tiranë dhe është bërë në një mesazh urimi për 100- vjetorin e Pavarësisë së Shqipërisë. Nëpërmjet deklaratës së saj, Sekretarja e Shtetit shprehet se SHBA është një partner dhe mik i Shqipërisë, dhe do të jetë i tillë edhe në të ardhmen.

"Që nga themelimi i një republike demokratike, Shqipëria ka bërë përparime të mëdha përpara. Sot, Shqipëria është e gatshme të konsolidojë ato fitore dhe të integrohet në një Evropë që është e tërë, e lirë dhe në paqe. Por kjo kërkon miratimin e reformave të mbetura tani, dhe kryerjen e zgjedhjeve të lira dhe transparente parlamentare pranverën që vjen, forcimin më tej të demokracisë dhe modernizimin e Shqipërisë; për t'iu përgjigjur nevojave të popullit shqiptar", - shprehet Sekretarja Amerikane e Shtetit, Hilari Klinton. Po dje, Presidenti Nishani mori mesazh të veçantë urimi edhe nga Papa Benedikti XVI. "Po ju shkruaj për të shprehur urimet e mia më të përzemërta, me rastin e Festës së Pavarësisë të Republikës së Shqipërisë. Në këtë rast të rëndësishëm, po dërgoj Shumë të Nderuarin Zef Gashi, Prift i Barit, si Përfaqësues të Selisë së Shenjtë, që sjell urimet e mia personale për ju dhe qytetarët tuaj. Nëpërmjet tij, jam i kënaqur t'ju përcjell sigurimet e lutjeve të mia, që ju dhe qeveria juaj të kërkoni forcimin e paqes, drejtësisë dhe përparimit për vendin. Duke përsëritur, zoti President, urimet e mia, ju dërgoj juve dhe popullit të vendit tuaj, bekimet më të shumta!" - shkruan Papa Benedikti XVI. Ndërsa Presidenti i Greqisë, Karolos Papoulias shprehet se: "për këtë përvjetor, i cili përbën një pikë kthese në historinë e popullit mik shqiptar, ju shpreh urimet më të sinqerta dhe më të përzemërta personale, si dhe urimet e popullit grek. Njëkohësisht, dëshiroj t'ju siguroj se do të vazhdojmë të punojmë për të çuar përpara marrëdhëniet tona dypalëshe, por edhe për të mbështetur përpjekjet që po bën vendi juaj në rrugën e tij për të bërë realitet perspektivën e vet evropiane".

Presidenti i Republikës italiane, Giorgio Napolitano shprehet: "Historia e popujve tanë është ngushtësisht e lidhur prej kohërave të lashta. Sot marrëdhëniet tona të veçanta e të ngushta bazohen në vlera e synime të përbashkëta, si dhe në angazhimin tonë të përbashkët në forumet ndërkombëtare në gjirin e Aleancës së Atlantikut. Dëshiroj t'ju përgëzoj për sukseset e arritura nga Shqipëria në kuadër të procesit të përafrimit në Bashkimin Evropian. Italia mbështet dhe përkrah vijimin e këtij rrugëtimi virtuoz".