Berisha, Basha, Thaçi e Jahjaga prenë tortën e 100-vjetorit të Pavarësisë!

Kryeministri i Shqipërisë, Sali Berisha, ai i Kosovës, Hashim Thaçi dhe Presidentja e Kosovës Atifet Jahjaga dhe kryebashkiaku Lulzim Basha kanë prerë tortën e përgatitur për 100-vjetorin e Pavarësisë. Torta 14 tonë për fat të keq nuk ka hyrë dot në Librin e Rekordeve Guinness, për shkak se nuk është gatuar e gjitha në ambientet e Pallatit të Kulturës. Kreu i Bashkisë së Tiranës, Lulzim Basha ka falënderuar 200 pastiçerët dhe qindra bizneset që ndihmuan në përgatitjen e asaj që ai e ka cilësuar torta më gjigante e ndërtuar ndonjëherë.

“Torta është e mjaftueshme sa për dy sheshe “Skënderbej” dhe do të shpërndahet kudo” tha Basha.

Torta gjigante është vendosur përpara Teatrit të Operës dhe Baletit ka të shkruar vitin 1912 u shpall pavarësia si dhe shqiponjën dy-krenare.

Gjithashtu pastiçierët kanë përdorur shegë dhe ullinjtë për dekorin e saj ndërsa shqiponja është e përbërë nga çokollata.



Kryeministri Sali Berisha uroi edhe një herë shqiptarët para pritjes së tortës gjigante.

“Gëzuar 28 Nëntorin, ditën e lindjes së shtetit shqiptarë. Edhe mijëra vite liri, shpresë dhe më të bashkuar se kurrë”, tha Berisha para se të pres tortën me sfond të kuq dhe shqiponjë e zezë.

Shtetarët nderojnë heronjtë e kombit

Përfaqësues të shtetit të Shqipërisë, Kosovës dhe Maqedonisë kanë marrë pjesë në ceremoninë e heronjve të kombit. Presidenti i Shqipërisë, Bujar Nishani dhe ajo e Kosovë Ahtifete Jahjaga, dy kryeministrat Berisha dhe Thaçi dhe dy kryetarët e parlamenteve Topalli dhe Krasniqi kanë vënë buqeta me lule pranë statujës “Nëna Shqipëri”.

Në këtë ceremoni mungojnë përfaqësuesit e opozitës, të cilët ndodhen në Vlorë duke ndjekur aktivitetet me rastin e 100-vjetrit të Pavarësisë. Ndërkohë Partia Socialiste bashkë me Lëvizjen Socialiste për Integrim do ta përkujtojnë nesër ditën e çlirimit të vendit.

Shqiptarët e trojeve etnike bashkohen në Vlorë

Sot ne kujtojmë 28 Nëntorin e viti 1912, ku shqiptarët u mblodhën në Vlorë për të shpallur Pavarasinë e që atëherë ka kaluar tashmë një shekull. Shqiptarët nga të gjitha trevat janë mbledhur sot në Vlorë për të kremtuar pikërisht këtë ngjarje, më e rëndësishmja e kombit, është dita që simbolizon bashkimin, prandaj të gjithë sot duhet të përulemi me nder e respekt para flamurit që ringjalli një komb!

Sot në Vlorë duket se historia do të përsëritet, pasi 40 pinjollë stërnipa të Isa Boletinit do t’i kthejnë qytetit flamurin origjinal kuqezi, që ky i fundit e mori nga Ismail Qemali, para se të kthehej në Kosovë.

Shqiptarët nga të gjitha trevat kanë ardhur në Shqipëri për të kremtuar ngjarjen më të rëndësishme të kombit, ditën që simbolizon bashkimin.

Aktivitete të shumta dhe festime mbarëkombëtare po zhvillohen sot si në Vlorë ashtu edhe në Tiranë, ku politika shqiptare për herë të parë do i harrojë problemet dhe do jetë e bashkuar, si për të vënë në vend ëndrrën e Ismail Qemalit!

Presidenti Bujar Nishani, kryeministri Berisha, kryetarja e Kuvendit Jozefina Topalli, kreu i PS-së Edi Rama, presidentja e Kosovës Atifete Jahjaga, kryeministri i Kosovës Hashim Thaçi, kryeparlamentari i Kosovës Jakup Krasniqi si dhe ministra dhe personalitete të larta të shtetit të gjitha bashkërisht kanë marrë pjesë në ceremoninë e ngritjes së flamurit në Vlorë.

Gjithashtu janë zhvilluar homazhe edhe në Monumentin e Pavarësisë si dhe do të vendosen kurora me lule në varrin e Ismail Qemalit. Gjithashtu do të mbajnë një fjalë përshëndetëse Presidenti Bujar Nishani dhe kreu i bashkisë së Vlorës Shpëtim Gjika.

Rama: Flamuri është Atdheu ideal, në mungesë të Atdheut të përbashkët

U zhvillua ekspozita e flamurëve në Vlorë në teatrin, Petro Marko, ku të pranishëm ishin organizatorët dhe anëtarët e opozitës. Gjatë ceremonisë së ekspozitës së flamurëve fjalën e ka marrë kreu i opozitës, Edi Rama.

Kreu i Partisë Socialiste, në Vlorë ka thënë se mbërritëm në Vlorë e rrugën e flamurit. Sipas tij, ekspozita fillon më një flamur të ngritur jashtë kufijve nga Ded Gjo Lulu, duke u shpalosur bashkë me historinë e flamurit tonë.

Rama ka vlerësuar flamurin, duke thënë se ai mbetet Atdheu ideal në mungesë të atdheut të përbashkët.

“Flamuri mbetet Atdheu ideal në mungesë të Atdheut të përbashkët. Sot ky 100-vjetor është i bekuar se atdheu është ilirë, sot flamuri është i lirë dhe i çliruar nga peshat e së shkuarës jemi të lumtur që ta shëtisim rrugën e flamurit në gjitha trojet shqiptare. Dhe është emocion i veçantë që këtë ekspozitë ta shohim me shqiptarët e Kosovës, Maqedonisë, Bujanovcit dhe Malit të Zi”, theksoi Rama.

Kreu i opozitës falënderoi kryetarin e bashkisë së Vlorës, i cili arriti të kalojë pengesat financiare që hasën gjatë rrugë për realizimin e kësaj ceremonie të jashtëzakonshme. Rama falënderon qytetarët e Vlorës, të cilët kanë hapur dyert për të gjithë shqiptarët nga të gjitha trevat.

Rama tha se 100-vjetori është një momente historik dhe refleksion për të ardhmen.

“100-vjetori është një moment historik për të për të ardhmen përmes së shkuarës për një Shqipëri ndryshe dhe Europiane është e mundur dhe jemi krenar që jemi pjesë e Partisë Socialiste që ka mbrojtur interesin kombëtar në të gjitha momentet kyçe. Gëzuar 100-vjetorin e Pavarësisë”, përmbylli fjalën e tij Rama.

Nishani: Flamuri ynë do bashkojë të gjithë shqiptarët

Nga Sheshi i Flamurit në Vlorë, Presidenti Bujar Nishani uroi gjithë shqiptarët për 100-Vjetorin e Pavarësisë.

Presidenti Nishani në fjalën e tij ka falënderuar figurat historike, të cilat i dhanë emrin Shqipërisë, pavarësisht mundit dhe përpjekjeve të armiqve për ta zhdukur këtë shtet. Në fjalën e tij, Presidenti i vendit Bujar Nishani ka theksuar se historia e vendit tonë në faqet e saj të shkruara dhe të pashkruara dëshmon për gjakun e derdhur, për sakrificat e pafundme.

“Ditëlindja e 100-të e shtetit shqiptar është ngjarja më e bukur për çdo bashkëqytetar kudo që jetojnë në Shqipëri dhe jashtë saj. Pikërisht sot e festojmë të bashkuar, të lirë, të fortë dhe me miq të shumtë. Kam nderin dhe privilegjin t’i ndaj me ju këto çaste që janë nga më të veçantat për mua”, tha Nishani.

Kreu i shtetit theksoi se, prej luftërave të kastriotëve dhe deri më sot simboli ynë, ky flamur që sot në këtë 100 vjetor ka bërë një rrugë të gjatë, sipas tij, gjatë kësaj rruge të mundimshme ia kemi arritur të mos ndahemi nga flamuri dhe ti dalim zot.

Ai tha se shqiptarët nuk mund të jetojmë ndryshe veçse në simbiozë me flamurin, si të pandashëm njësh si trupi dhe shpirti, ku shtoi se shqiptarët janë një dhe të gjithë se bashku.

“Të vazhdojmë ta mbajmë të pastër simbolin tonë. Nën dritën që na bashkon dhe rrugën na e tregon ky flamur. Me ngjyra ekzaltuese, nga më të vjetrit dhe krenarët është flamuri ynë. Gëzuar festën të gjithë shqiptarët në trevat tona, qoftë e bekuar kjo ditë”, përmbylli fjalën e tij Nishani.

Një nga lajmëtarët nga Gjilani, i cili ka udhëtuar prej 18 ditë në këmbë në Vlorë në mënyrë simbolike i dorëzoi flamurin Presidentit të Republikës së Shqipërisë.

Anartri i grupit nga Gjilani tha se lajmëtarët purrën flamurin në Vlorë dhe në këtë mënyrë përmbushën amanetin e të parëve për të qenë gjithmonë të bashkuar.

Kreu i bashkisë së Vlorës, Gjika uron shqiptarët

Fjalën e parë përshëndetëse e ka mbajtur Kryetari i Bashkisë së Vlorës Shpëtim Gjika, i cili u ka uruar të gjithë shqiptarëve kudo që ndodhen 100-vjetorin e Pavarësisë.

“Ja tek erdhën sot në këtë ditë të bekuar të 28 nëntor të viti 1912. I gjithë kombi i ka kthyer sytë nga Vlora, nga qyteti jonë e flamurit dhe te ky shesh që mban emrin sheshi i flamurit. Të gjithë shqiptarët u nisën nga të katër anët në një marshim emblematik drejt Vlorës, me kalë edhe me këmbë. Një përshëndetje plot me mall më lejoni t’ua drejtoj atyre që janë larg që nuk mundën dot të jenë këtu me ne. 28 nëntori është një ngjarje historike nga më të rëndësishmet. Ajo është ditëlindja e të parit shtet modern shqiptar” theksoi Gjika.

Berisha e Rama shtrëngojnë duart

Kryeministri Berisha pas përqafimit të ngrohtë me kryeministrin Hashim Thaçi, Berisha është përshëndetur edhe me kreun e PS-së Edi Rama. Ata kanë shtrënguar duart.

/Shekulli Online/ E.L/ E.Sh/