Berisha, lojë fjalësh në frëngjisht me grekët!

Kreu i Ekzekutivit, Sali Berisha, ka komentuar anulimin e vizitës së ministrit të Jashtëm grek, Dimitris Avramopulos, për 100-vjetorin e Pavarësisë, duke thënë se “miqtë e mirë shkëlqejnë edhe kur mungojnë”. Një shprehje franceze që sipas shpjegimit linguistik ka dy kuptime atë të drejtpërdrejtë dhe atë ironik. Shprehja frazeologjike, "Briller par son absence", e drejtpërdrejtë dhe përkthim fjalë për fjalë do të thotë “Miqtë shkëlqejnë në mungesë”, ndërsa me ironi -“Miqtë na kanë lënë”. Kryeministri ka sqaruar qëndrimin për bashkim kombëtar. Ai u shpreh se e ardhmja e përbashkët në Bashkimin Evropian është moto e çdo shqiptari. Gjatë konferencës për shtyp të Kryeministrit dhe homologut të tij slloven, Janez Jansa, Berisha tha se, “Motoja e shpallur është: Të bashkohemi njëri me tjetrin, të bashkohemi me Evropën. Unë mendoj se kjo moto është një moto e drejtë. Ne duhet të punojmë kudo që jemi në projektin evropian. Për të kapërcyer qindra e qindra ndarje, pengesa që janë vendosur një shekull gjatë midis shqiptarëve", deklaroi Berisha. “Miqtë shkëlqejnë gjithmonë me mungesën e tyre”. Kjo është përgjigjja diplomatike e kryeministrit Berisha për mospjesëmarrjen e ministrit të jashtëm grek në festimet e 100-vjetorit, duke synuar të mbyllë në këtë mënyrë keqkuptimet. /SHEKULLI/