Diana Avdiu: E gatshme për “Miss Universe 2012”

Kanë mbetur edhe pak ditë që modelja e njohur Diana Avdiu do ta përfaqësoj Kosovën në “Miss Universe 2012” që do të mbahet në Las Vegas. Diana tani ka nisur përgatitjet për këtë eveniment mjaftë të rëndësishëm dhe tani e disa ditë ajo ndodhet në Las Vegas. Spektakli i madh i garës së më të bukurës së universit, Miss Universe, do të zgjidhet më 19 dhjetor dhe Diana tashmë ka nisur provat e para. “Pas një qëndrimi disa ditësh në Amerikë, tani erdha këtu në Las Vegas për t’u përgatitur për spektaklin e madh ‘Miss Universe’ që do të mbahet më 19 dhjetor. Provat fillestare i kemi bërë dhe tani çdo ditë po bëjmë përgatitje në mënyrë që në mbrëmjen e 19 dhjetorit të performojmë sa më bukur”, ka thënë ajo për “Zëri”. Diana tani ndodhet në mesin e 84 bukurosheve të cilat përfaqësojnë shtetet e tyre dhe që në fillim reagimet kanë nisur për bukuroshen kosovare.

Sipas menaxherit të saj Labinot Gashi, Diana aktualisht është duke u pëlqyer nga shumë shtete të botës. “Që në fillim reagimet kanë nisur nga shumë përfaqësuese të botës, në realitet Diana vazhdon të jetë komunikatave dhe e shoqërueshme me të gjitha konkurrentet, prandaj ajo po pëlqehet nga shumë prej tyre. Ajo tashmë është bashkë edhe me bukuroshen nga Shqipëria Adrola Dushi me të cilën po mundohen të punojnë sa më shumë për tu paraqitur sa më bukur. Kemi shpresa tek Diana dhe urojmë që të na befasoj në këtë garë të madhe ndërkombëtare”, shprehet Labi.

Tashmë kanë filluar edhe votat dhe ju mund të votoni deri në 10 herë në ditë deri më datën 18 dhjetor. Kontributi dhe votat janë shumë të vlefshme sepse e çojnë Dianën dhe vendin tonë direkt në gjysmëfinale, andaj mos hezitoni të votoni.