Elda Koçi nxjerr sekretet e jetës dhe ndarjes nga Redon Makashi!

Redon Makashi dhe Elda Koçi, pas gati 20 vitesh lidhje dashurie u ndanë pranverën e këtij viti, duke i dhënë fund kështu një historie të gjatë mes tyre. Të dy pas ndarjes nuk kanë preferuar të japin detaje, duke e lënë kështu të hijezuar arsyen e fortë që i dha fund kësaj dashurie të gjatë, të nisur qysh në kohën kur ata ishin gjimnazistë. Siç ka treguar edhe vetë gazetarja vite më parë në një intervistë për një të përditshme, Redonin dhe atë i ka mbajtur lidhur mirëkuptimi me njëri-tjetrin, sikur të ishin shokë të ngushtë, e më pas dashuria, e cila sa vinte e bëhej më e fortë. Por siç duket, jo gjithçka shkoi ashtu siç pritej dhe gjithçka mes tyre duket se mori fund, edhe pse Redoni nuk e ka pohuar kurrë këtë ndarje, të paktën publikisht. Gazetarja e njohur e RTSH-së në kohën e ndarjes pohoi se gjithçka që lidhej me këtë histori dhe jetën e saj me një nga këngëtarët më të njohur në vend, shumë shpejt do ta hidhte në një libër dhe duket se momenti i shumëpritur për kuriozët është finalizuar. Me anë të një njoftimi në Facebook, Elda ka thënë se libri i saj është gati për të dalë në treg.

Libri i titulluar “Legjenda Redon” do të ketë jo vetëm rrëfimin e Eldës për jetën me Redonin, por edhe shumë fotografi të papublikuara të tij dhe të njerëzve që kanë jetuar me të. “Miqtë e mi virtualë, gazetarë të medias së shkruar dhe elektronike. Shumë shpejt del në treg katalogu “ALIVE 2013″, që do të thotë një rikthim i imi në botën e SPEKTAKLIT, por jo vetëm! “ELDAGENCY” nuk do të merret vetëm me modën, por tashmë është edhe një agjenci biografike e botës së brendshme të të gjithë artistëve shqiptarë, që do të thotë… Surprizë! Libri i parë në treg, “LEGJENDA REDON” .. Të thënat dhe të pathënat e një VIP-i”: histori jete, fotografi të papublikuara më parë, jo vetëm të personazhit kryesor por edhe të atyre që kanë jetuar me të. Ky është vetëm VIP-i i parë! Kush do e ketë radhën si i hulumtuar në penën time?!

Më uroni fat dhe sukses!”, ka shkruar Elda, duke shprehur qartë se biografitë mbi jetën e njerëzve të njohur nuk do të mbeten vetëm tek Redon Makashi, njeriu me të cilin ka kaluar plot 20 vite të jetës së saj, por edhe tek personazhe të tjerë të njohur. Mbetet për të parë se çfarë detajesh do të zbulojë Koçi dhe, a do të ketë në libër pasazhe mbi arsyet e vërteta të ndarjes së çiftit. /MAPO/