Bie mbështetja e industrisë shqiptare për integrimin e Shqipërisë në BE!

TIRANË - Konfindustria vlerëson, se ka një rënie të dukshme të mbështetjes së një numri të madh të sektorëve të industrive vendore për procesin e integrimit të Shqipërisë në Bashkimin Europian. Mbështetur në të dhënat e sondazhit krahësimor në periudhen 2010-2012 të zhvilluar me përfaqësues të sektorëve të industrive vendore nga Qendra e Studimeve të Konfindustrisë del, se mbështetje e prodhuesve vendore për integrimin e Shqipërisë në BE në intervalin kohor 2-vjeçar ka rënë në shifrat mesatare me mbi 27%.

Rënia është mjaft më e fortë në industritë vendore, që i përkasin sektorëve, që prodhojnë për tregun e brendshëm kryesisht të industrisë agroushqimore, të pijeve alkoolike dhe jooalkolike, të prodhimit të materialeve të ndërtimit, të mobilerisë, etj. Përfaqësuesit e sektorëve të industrisë, që prodhojnë lëndë të para për eksport, kryesisht në industrinë minerare, janë shprehur të qëndrueshëm në gatishmërinë e tyre për integrimin e Shqipërisë në BE.

Arsyet kryesore të rritjes së mosbesimit dhe të uljes së gatishmërisë së industrive prodhuese shqiptare për integrimin e vendit në BE është zhgënjimi nga pritshmëritë e zbatimit të MSA dhe të Marrëveshjes së Përkohshme të Tregtisë Shqipëri- BE, rritja e shkallës së konkurrueshmërisë së prodhimeve dhe shërbimeve me origjinë nga BE në tregun vendor si pasojë e politikave të gjykuara si dumping me financime të BE etj.

Ulja e mbështetjes së gatishmërisë të industrive vendore për procesin e integrimit në BE është mjaft e shpejtë sidomos në vitin e 2012, që përputhet dhe me vështirësitë në rritje të ekonomisë shqiptare nga pasojat e krizës globale dhe vendeve kryesore partnere në tregti të Shqipërisë si Italia dhe Greqia.

/Shekulli Online/Përgatiti:M.A./