Fton për darkë fqinjin dhe pasi dehen, i vë flakën!

Librazhd/ Grinden për femra dhe i vë flakën fqinjit pasi e spërkat me benzinë. Kjo ndodhi në fshatin Dardhë të Librazhdit dhe ka si protagonist Jashar Hoxhën dhe Servet Poçin, 30 vjeç. Ky i fundit, ka qenë në kafenë e fshatit kur një shok e ka marrë në telefon dhe i ka thënë se po priste te shtëpia e Jashar Hoxhës për të pirë. Gjithçka ka ndodhur orëve të mbrëmjes së të shtunës, ndërsa Servet Poçi ka marrë rrugën dhe ka shkuar në shtëpinë e Hoxhës.

Pasi kanë kanë ngrënë darkë dhe konsumuar pije alkolike, ka plasur një sherr mes tyre e për pasojë i zoti i shtëpisë e ka kërcënuar Poçin me djegie. E, në të vërtet, ashtu ka ndodhur; në momentin kur Serveti, djalë fqinji ka dalë nga banesa e Hoxhës, ky i fundit i ka zbrazur një shishe benzine në trup. Atëherë Hoxha ka ndezur shkrepësen dhe i ka vënë flakën. Djali me plagët e djegies është mbajtur në shtëpi deri mëngjesin e së dielës, kohë kur edhe është nisur për në spitalin e Librazhdit. Në momentin që ka mbërritur në spi- tal mësohet se gjendja e tij ka qenë tejet e rënduar, ndaj 30-vjeçari është sjellë në gjendje tërësisht kritike për jetën në repartin e djegieve në QSUT.

Ngjarja sipas policisë

Pas denoncimit të aktit të rëndë, efektivët blu të këtij komisariati kanë mbërritur në shtëpinë e Jashar Hoxhës. Janë marrë dëshmitë e para në të dy familjet, atë të Hoxhës dhe të Fatmir Poçit, të atit të Servetit, ndërkaq është vënë në pranga autori i sulmit ndaj të riut, Jashar Hoxhën 55 vjeç, baba i 8 vajzave. Bashkë me të në policinë e Librazhdit është shoqëruar edhe dëshmitari okular i krimit të pazakontë Genci Brahja, të cilët kanë sqaruar rrethanat në të cilat ka ndodhur akti makabër. Referuar të dhënave të besueshme të policisë së Elbasanit, pasi ngjarja po hetohet nga Krimet e Rënda, mësohet se gjithçka ka si motiv një grindje banale mes personave në shtëpinë e Hoxhës. Ndërkohë rrëfimi në polici i Brahjes ka nxjerrë edhe shkaqet e sherrit të cilat lidhen me debate për femra.

Dyshimet e para të policisë bien mbi ndonjë problem të hershëm mes personave që është tentuar të zgjidhet me djegie të 30-vjeçarit. 55-vjeçari që njihet në fshat edhe si hoxhë nuk ka pasur me familjen Poçi asnjëherë çështje prone dhe as ndonjë konflikt tjetër familjar që mund të çonte deri në aktin e rëndë kriminal. Mirëpo, ditën e djeshme familja e të riut, kur ka mësuar për gjendjen e rënduar të djalit të tyre ka kërcënuar me vetëgjyqësi nëse nuk do të zbardhet ngjarja dhe drejtësia nuk do të dënojë hoxhën, që sipas tyre, njihet për një person mjaft problematik pasi alkoolizohet.

/Shekulli Print/Nikoleta Kovaçi/