Divorci, ish-gruaja e Berluskonit përfiton 3 mln euro në muaj !

3 milion euro në muaj. Eshtë kjo shifra që do të përfitojë ish-bashkëshortja e Silvio Berluskonit, Veronica Lario, pas vendimit të dhënë nga gjykata civile e Milanos. Përfundon kështu pas tre vjetësh betejë, procesi i ndarjes mes ish-kryeministrit të Italisë dhe gruas së tij. Gjykata vendosi që kavalieri të mbajë pasurinë, ndërsa Veronika do të përfitojë një çek prej 100 mijë euro në ditë, 3 milion në muaj, ose 36 milion euro çdo vit, bazuar në kriteret e nenit 156 të kodit civil. Megjithë shumën marramendëse, ish-gruaja e Berluskonit del nga kjo çështje pa asnjë pronë të patundshme. Përgjatë këtij procesi të gjatë mes dy njerëzve që kanë qëndruar bashkë prej 30 vjetësh dhe të martuar prej 22 vjetësh, pati një moment kur dukej se çifti mund të arrinte një marrëveshje, pas ofertës që Veronika të mbante Villa Belvedere, që e kishte shumë për zemër, sepse ka jetuar 20 vjet dhe aty ka rritur tre fëmijët e saj. Ky vendim i gjykatës nuk i lejon gjithashtu Veronikës të “fusë hundët” as në perandorinë “Finincest” të Berluskonit, ndërsa 3 fëmijët me të përfitojnë 7.5 % të kompanisë, ndryshe nga dy fëmijët e mëdhenj të martesës së parë që janë në krye të grupit.