Meta: PO qeverisjes me Berishën!

Kryetari i Lëvizjes Socialiste Ilir Meta i është përgjigjur pozitivisht ftesës së kryetarit të Partisë demokratike Sali Berisha për të krijuar qeverinë e re të dalë pas zgjedhjeve parlamentare të 28 Qershorit.

Kreu i LSI-se pohoi se nuk është shumë i lumtur për deklaratën e dhënë, por pas përpjekjeve që ka bërë vazhdimisht për largimin e Berishës nga pushteti, për të rivendosur bashkëpunimin me Ramën, si dhe pas konsultimeve në faktorin e huaj, ndjen se kjo është rruga e drejtë për të mos e futur vendin në krizë.

“Pasi jam konsultuar me aktorët e rëndësishëm vendas dhe ndërkombëtarë të cilët kërkojnë përshpejtimin e reformave dhe stabilitetin e vendit, me përgjegjësi historike dhe kombëtare pranoj ftesën e kryetarit të qeverisë për të realizuar negociatat paraprake për të realizuar programin e integrimit europian”, u shpreh Meta nga selia e LSI sot rreth orës 14:00.

Meta theksoi se i është dashur të bëjë zgjedhjen më të vështirë si politikan dhe lider, por është i vendosur, pasi hapi i tij është në interes të vendit.

"Do të isha i gatshëm të qëndroja në opozitë, por me këtë sakatim që ka pësuar kodi, LSI nuk mund të qëndronte e vetme në opozitë, vetëm me 4 deputetë", u shpreh Meta.

Ai theksoi se për momentin nuk ka asnjë bisedim paraprak për ndarje postesh, por çdo veprim që do të kryhet ditët në vazhdim do të jetë transparent për publikun.

Berisha fton LSI për bashkëqeverisje

Kryetari i Partisë Demokratike (PD) Sali Berisha i ka bërë ftesë Ilir Metës, kryetarit të Lëvizjes Socialiste për Integrim (LSI), të hyjnë në koalicion për krijimin e qeverisë së re.

Sipas Berishës, LSI plotëson të gjitha kushtet për një koalicion me të djathën, pasi ka program të ngjashëm me atë të PD. Berisha nuk përjashtoi se në qeverinë e ardhshme do të bëjë pjesë edhe Partia Republikane e Fatmir Mediut.

Në një konferencë për shtyp pak para mesditës në selinë e PD, Berisha ka bërë të ditur koalicionin e ardhshëm që ai ka projektuar pas rezultateve paraprake që ka publikuar deti tani KQZ.

“Sovrani na diktoi koalicionet. Ftoj Lëvizjen Socialiste për Integrim (LSI) si partia që programin më të afërt me ne të bashkëpunojë për krijimin e qeverisë së re. LSI të vlerësojë sinqerisht ftesën”.

Kryetari i demokratëve e justifikoi ftesën si të natyrshme për 3 arsye, për përqindjen e votave që kanë marrë në këto zgjedhje, për programin që LSI ka dhe për persekutimin që i është bërë në proceset zgjedhore dhe që sot sipas Berishës, meriton të fitojë atë që meriton.

“LSI është subjekti me programet më afër PD. Ka studiuar programin e integrimit të Shqipërisë në BE, LSI ka punësimin si kryefjalë ashtu si PD. LSI e ftoj gjithashtu me bindjen time si përfaqësuese dinjitoze, jeni dëshmitarë sesa e persekutua kjo parti në dy zgjedhjet e fundit. Jeni dëshmitarë kur unë kam bërë thirrje në atë periudhë qe te gjendet gjuha e bashkimit jo e përjashtimit. Shpreh bindjen se ato 47% të votave qe sovrani i dha koalicionit të parë, i shtohen dhe 6% votave të spektrit të majtë dhe faktikisht. Kam besim se kjo forcë politike do ti përgjigjet pozitivisht ftesës sime të hapur e të sinqertë”.

Gjithsesi Berisha shtoi se qeveritë e minorancës nuk janë shumë të pëlqyeshme, por që parlamenti mund ti mbajë në pushtet për disa arsye.

“Jam i sigurt se koalicioni do të funksionojë. Kjo qeveri do të ketë baza solide, sepse ne kemi shtyllat kryesore të programit të përbashkëta”, mbrojti tezën e tij Berisha. Ai siguroi LSI se nuk ne rast koalicioni te mundshem, PD nuk do te ushtrije trysni tek kjo parti.

Edi Rama, Gëzuar ditëlindjen!

I pyetur nga mediat sesi do të reagojë kryetari i opozitës rreth kësaj ftese që kreu i PD i bëri LSI në këtë përvjetor të 45 të ditës së lindjes, Berisha u shpreh : “I uroj ditëlindjen Edi Ramës. Vitet e ardhshme t’i sjellin më shumë rini” .

Në qeveri edhe PR e Mediut

Qeveria e re sipas Berishës do të ketë në kabinet edhe përfaqësues nga Partia Republikane. I pyetur nga mediat se nëse PR e Fatmir Mediut do të jetë pjesë e qeverisë së re, Berisha u shpreh se “ka një marrëveshje për dhe pas zgjedhor për koalicion me PR që vlen. Unë do respektoj marrëveshjen”, theksoi Berisha.

KQZ veproi drejt me rezultatet

Berisha ka justifikuar rezultatin që u shpall dje nga KQZ për mandatet e fituara nga partitë në këto zgjedhje parlamentare. “Askush nuk dha rezultate definitive. Rezultatet paraprake lejohen. KQZ shpalli rezultate paraprake që është një standard konstant i kërkuar dhe sanksionuar nga konventat ndërkombëtare për zgjedhjet”.

Shpallet rezultati paraprak, nuk pranohet nga opozita

Zëdhënësi i Komisionit Qendror të Zgjedhjeve në Tiranë, Leonard Olli, ka shpallur rezultatin paraprak të zgjedhjeve të 28 qershorit.

Zoti Olli tha se Aleanca për Ndryshim e kryesuar nga Partia Demokratike, ka marrë 46.9% të votave ose 71 mandate për Kuvendin e ri. Ndërsa Bashkimi për Ndryshim i kryesuar nga Partia Socialiste ka marrë 45.36% të votave ose 65 vende në parlament dhe Aleanca Socialiste për Integrim ka marrë 5.56% ose 4 mandate.

Komisioni Qendror i Zgjedhjeve vazhdon të numërojë kutitë e votimit të ardhura nga dy zona në Qarkun e Lezhës dhe Qarkun e Fierit.

Deri në shpalljen e rezultatit paraprak ishin numëruar votat në 4704 qendra votimi nga 4753.

Sipas zëdhënësit të KQZ-së afro 50% e elektoratit ka marrë pjesë në votime.

Kundërshtime

Opozita e ka kundërshtuar shpalljen e rezultateve. Ajo pret që të numërohen të gjitha votat.

Presidenti i Asamblesë së Partisë Socialiste, Gramoz Ruçi, e cilësoi deklarimin e KQZ-së si “provokim nga ana e kryeministrit Sali Berisha". Sipas zotit Ruçi shpallja e rezultatit paraprak ishte "e paligjshme dhe e pavërtetë".

Edhe anëtarët e opozitës në Komisionin Qendror të Zgjedhjeve e konsideruan të paligjshëm shpalljen e rezultatit nga zëdhënësi i KQZ-së.

Ata thanë se procesi i numërimit të votave nuk ka përfunduar, procesi vazhdon dhe se rezultati mund të jepet pas numërimit të gjithë votave dhe pas përfundimit të ankimimeve.

Procesi

Më herët zëdhënësi i KQZ-së, Leonard Olli, kishte thënë se rezultati përfundimtar do të jepej kur të përfundojë gjithë procesi dhe procedurat e ankimimit sipas Kodit Zgjedhor.

Në ditën e gjashtë të këtij procesi, SHBA përmes ambasadorit në Tiranë, John Withers, bënë thirrje për përfundimin në mënyrë të rregullt, jo partiak dhe profesional të procesit të numërimit të votave.

Zgjedhjet janë një test për të konfirmuar kredencialet demokratike të Shqipërisë dhe Bashkimi Evropian ka thënë se një proces i rregullt do ta ndihmojë vendin që t'i afrohet më shumë Evropës.