Del Piero si Maldini, historia e pret!

Edhe historia shpreh mendime pozitive: Alesandro Del Piero nuk diskutohet. Nëse do të luajë në Europian, siç tashmë duket diçka e sigurtë, "Zoti Juventus", do të arrijë një rekord të jashtëzakonshëm për sa i përket cilësisë dhe jetëgjatësisë: do të bëhej fjalë për shtatë faza finale të luajtura nga "Pinturikioja". Si Paolo Maldini, që vendosi të ndalojë në 2002-in pas Botërorit të Koresë dhe të Japonisë. Asnjë italian, përveç atyre, nuk ka arritur kaq lart me kombëtaren e tij. Mes futbollistëve "axurrë" për udhëtimin drejt Austrisë dhe Zvicrës, Del Piero është i vetmi që ka luajtur deri tani gjashtë faza finale në veprimtari ndërkombëtare, mes Europianit dhe Botërorit. "Parabola" e tij filloi 12 vjet më parë në Angli, nën drejtimin e trajnerit të atëhershëm Arrigo Saki. Gjithsej 45-së minuta në ndeshjen e parë "Euro '96" kundër Rusisë, pastaj vjen zëvendësimi i papritur: në vend të tij hyn "një farë", Roberto Donadoni, që sot ka detyrën për të orientuar fatin e kapitenit të Juventusit. Nuk ishte ndonjë çudi e madhe, sepse Aleksi atëherë ishte vetëm 21 vjeç, në hapat e parë të një karriere gjigante dhe të mrekullueshme, ndërsa "mësuesi" i tij aktual, që i zuri vendin, ishte drejt fundit të karrierës (ishte 33 vjeç). Më pas Del Piero vazhdoi "sprintin" e tij në "Francë '98", i zgjedhur mes më të mirëve italianë nga Çezare Maldini. Ndonëse në atë botëror konkurrenca ishte e madhe, sulmuesi bardhezi nuk zhgënjeu për aq sa iu dha mundësia. Pastaj radhën e kishte "Euro 2000" në Holandë dhe Belgjikë nën drejtimin e Dino Zofit, "Botërori 2002" në Azi nën drejtimin e Xhiovani Trapatonit, Europiani i 2004-ës në Portugali sërish i drejtuar nga trajneri veteran, dhe "parajsa" në "Gjermania 2006" nën urdhrat e Marçelo Lipit, ku Del Piero shënoi dhe golin e sigurisë ndaj Gjermanisë në gjysmëfinale. Objektivi tani është të arrijë në fazën e shtatë finale radhazi. Një objektiv jo i arritur nga kapiteni kuqezi Maldini, që nuk mundi të luajë në Europianin e 1992-it, sepse Italia u skualifikua në ndeshjet në grupe.
Sporti Shqiptar.