Matura 2013, mbyllet shkolla, nisin përgatitjet për tezën e parë!

Minstria e Arsimit konfirmon se maturantët do të kenë mundësi që pas datës 26 maj të nisin konsultimet pa pagesë në shkolla, sipas një kalendar.

Mbi 40 mijë gjimnazistë në rang vendi mbyllin të premten, në 24 maj vitin shkollor, për tu përgatitur për provimin e parë të Maturës, atë të Gjuhë dhe Letrisisë Shqipe që zhvillohet javën e ardhshme. Minstria e Arsimit konfirmon se maturantët do të kenë mundësi që pas datës 26 maj të nisin konsultimet pa pagesë në shkolla, sipas një kalendari. Teza e provimit edhe për këtë vit do të ndahet në dy pjesë, ku përfshihet testimi i njohurive për dy fragmentet e shkëputura nga veprat e autorëve shqiptarë dhe atyre të huaj. Rreth 60 për qind e pyetjeve të testit i përkasin lëndës së letërsisë, ndërsa pjesa tjetër rreth gjuhës. Testi do të ketë në përbërje fragmente nga tekste të ndryshme (tekst tregimtar, tekst poetik, tekst dramatik, tekst bindës/argumentues, tekst përshkrues, tekst shpjegues, tekst informativ, tekst eseistik, tekst kulturologjik), jo domosdoshmërisht të punuara në klasë.

Struktura e pyetjeve do të ndërtohet në mënyrë të tillë ku të jenë të përfshira të tre nivelet e vështirësisë. Njëra nga pyetjet me zhvillim është esse. Specialistët shtojnë më tej se maturantët duhet të tregohen të kujdesshëm gjatë periudhës përgatitore dhe të mos mbështeten vetëm në perceptimin e fragmentit të tekstit, pasi testi do të përmbajë edhe pyetje rreth tërësisë së veprës së autorit përkatës.

Teza e provimi do të përmbajë 25 pyetje. 13 pyetjet e para janë me zgjedhje, ku do të rrethohet vetëm shkronja përbri përgjigjes së saktë. Pyetjet e tjera kanë kërkesa që janë me zgjidhje dhe arsyetim. Pranë secilës pyetje ka hapësirë për të bërë veprimet e nevojshme. Koha e vënë në dispozicion të maturantëve për zhvillimin e testit është 2 orë e 30 minuta. /ikub/